U Deputy Commissioner ka East Jaiñtia Hills District u A. Baranwal, IAS ula pyntip ba na ka daw jong ka jingiai bteng ka jingtwa ka khyndew nalor ki lum ka la pynsahkut biang ia ka surok bah NH-6 ha ki bynta jong ka ka shnong Sonapyrdi (Sonapur) Tunnel bad ula iathuh ba kane kan dang shim por haduh 24 kynta ban lah pynkhuid ia katei ka khyndew.
Kane ka jingiaid tuid jong ka khyndew ktieh ryngkat ki maw na ki sharing lum kan long ruh ka jingma ia ki nongleit nongwan lyngba kane ka surok bah. Kumta u DC ula bthah ia ki nongleit nongwan lada long kaba lah dei ban sangeh shwa ka jingleit lynti jong ki bad na ka bynta kito ki kali kiba dei iaid sha kiwei pat ki jylla ki lah ban iaid da kawei pat ka lynti lada long kaba lah, kat bym pat lah ban pynkhuid ia katei ka khyndew ktieh.
Na ka liang ki bor pyniaid jong ka National Highway Authority of India (NHAI) kila trei shitom ban ioh pyllait shiliang ia u surok, ha ryngkat ka jingiarap lem jong kiwei de ki kynhun la pyntip shuh shuh u DC.
