“Hadien ka khlam Covid-19, nga don jingmut ban sdang noh ïa ka jinghikai halor ka rep ka riang: Principal
Kawei na ki skul na Ri-Lum Jaiñtia kaba wan bha shakhmat ha ki exam bapher bapher jong ka MBOSE ka North Liberty Higher Secondary School, Mookyrdup Jowai ha kane ka sngi saitjaiñ kala pynlong ïa ka jingpynkup burom ba kyrpang ïa ki samla pule jong ka kiba la pass ha une u snem 2023 ha ka kyrdan Class-X, kumjuh ha ka Class-XII (Science) bad Class-XII (Arts).
Ïa ka jingïalang ha kane ka sngi la pynlong ha phyllaw jong katei ka skul ba la pynïaid da ka nonghikai skul ka Deigratia Syngkrem, ha kaba u ma Sniawbhalang Dhar uba dei ruh symbud Myntri Rangbah ka Jylla ula long kum u kongsan, ha ka jingdonlang ka DSEO WJHD kong A.P. Syiem, Dolloi ka Elaka Jowai ma Puramon Kynjing, u Principal jong ka skul u ma B. Richard Uriah, ki nongseng ïa ka skul kiba dei ki kmie bad u kpa jong u, ki nongïalam shnong, ki nongshah khot sngewbha nalor ki kmie ki kpa bad ki khynnah skul.
Ha kane ka sngi na ka liang ka skul kum ka dak ban ai mynsiem ïa ki rangïalehkai (Gold Medalist Athletes) kala pynlong ruh ka jingpynkup burom ïa ki, na ka liang ki katto katne ngut ki samla pule bala pass na kane ka skul ki la ai ka jingkren bad mynta kiba la bteng ïa ki jingpule ha ki kyrdan ba kham shalor.
Na ka liang u Synbud Myntri Rangbah ma Sniawbhalang Dhar haba ai jingkren ula ai ka jingïaroh ïa u Principal jong kane ka skul uba long u rishot ba khraw jong ka Ri-Lum Jaiñtia bad dei na kane ka skul la pynmih shibun ki samla pule ki ban rung hapoh ki kyrdan Top Ten bad Top Twenty jong ka result MBOSE ha manla u snem.
Ha ka juh ka por ula kyntu ïa ki samla pule ba kin long kiba minot thop ha ki jingpule ha ryngkat ka jingtreishitom ban ïoh kheit ïa u soh ka jingjop bad ban long ruh kiba don ïa ka thong ha ka jingim na ka bynta ka lawei ba phyrnai.
Ula ong ba ka pynthei mynta kam dei shuh kum ha ki por mynshwa ba ka kam ka dang dawa bha wat lada pass tang ïa ka kyrdan Class-10, hynrei mynta ka la kylla nadong shadong ba kala long pynban kum ka jingïaleh (Competition) la ha kino kino ki bynta, kumta ka donkam shisha ban ïoh ka jingnang jingstad kaba biang nadong shadong.
Kum ka dak ban sdang sa kawei ka shlem ai jinghikai hapoh katei ka skul shaphang ka rep ka riang ne ka (vocational Course in Agriculture) na ka liang u ma Dhar ula plie pyrda ha katei hi ka sngi ban sdang ïa ka.
La ïathuh khyndiat halor kane ka jinghikai ban ai sha ki samla pule ka skul da u Principal, u ba ong kane kala wan ha ka jingmut jingpyrkhat jong u hadien ka jingeh kaba mih na ka jingwan lynshop jong ka khlam Covid-19. Ula ïathuh ba ha kitei ki snem jong ka jingkhamdam baroh ki kam ki jam la hap ban pynsangeh lut, hynrei ïa ka kam rep kam riang na ka liang ki nongrep kila hap mih sha ki jaka rep ban pyndep ïa ka rep ka riang na ka bynta ban pyndap pynbiang ïa ka bam ka dih.
Kumta ula ong ba ka donkam bah ban sdang noh ïa kane ka lad ai jinghikai ha ka rep ka riang ha ki khynnad skul. Shuh shuh ula pyntip ba ka skul kala pynkhreh shibun ki lad ai jinghikai Coaching na ka bynta ki khynnah skul ki ban ïakhun ïa ki exam bapher bapher naduh ki laiñ Doctor bad Engineer.
La pynphuh pynphieng shuh shuh ïa kane ka sngi da ki jingrwai, ki jingshad tynrai, ka Choreography bad kiwei kiwei de ba la shim bynta da ki khynnah jong katei ka skul.
