Ka VDP jong ka Dorbar Shnong Moosakhia ha kane ka 15 tarik mynta u bnai kala pynlong ia ka Awareness prokram na ka bynta ki nongshong shnong ba kin tip khambha halor ki aiñ kiba iadei bad ka jingtreikam jong ka VDP khnang ba ka VDP kan ioh ban trei ia ki kam kiba bha na ka bynta ban wanrah ia ka shongsuk shong shngaiñ hapoh ka shnong ka thaw baroh kawei.
Ha katei ka sngi na ka liang ka VDP shnong kala khot sngewbha ia u OC ba peit ia ka Amlarem Police Station ban long u kongsan ban ai ia ka jingpynsngewthuh sha ki paidbah halor ki aiñ jong ka sorkar kiba iadei bad ka kam VDP. La khot sngewbha ruh ia ki wei de ki rangbah kiba kynthup ia u ma Rimiki Pde na Head ophis jong ka VDP Jowai SP Office, u ma H.H. Mohrmen bad kiwei de.
U Kongsan, OC ka Amlarem PS ma A. Phawa haba kren ha kane ka sngi ula pynshai halor ka kamram bad ka jingtrei jong ki VDP shnong. U ong ba ki VDP ki long ki nongiarap kiba hajan eh jong ka shnong ki ba iarap ban peit ia ka shongsuk shongshngaiñ bad ka bha ka miat hapoh shnong pohthaw, la ju tip ruh ia ki kum ki Pulit shnong, namar ka kamram jong ki ka long ruh ban iarap ia ka tnad Pulit jong ka sorkar.
Ula ong ruh ba wat la ka kam VDP ka dei tang ka kam trei mon sngewbha hynrei ka paw ba ki dkhot ki long kiba trei shitom na ka bynta ban peit ia ka suk ka saiñ hapoh ka shnong ka thaw. Kumta ula kyntu ia ki nongshong shnong baroh ba ki dei ban don ka jingiatreilang bad ki VDP shnong khnang ba yn lah ban teh lakam ia ki kam sniew ba harukom.
La ioh ruh ka jingkren na u ma Rimiki Pde uba la batai halor ki kam bapher bapher ba ki VDP ki don ban leh na ka bynta ka bha ka miat jong ka shnong ka thaw. Kumjuh ruh la ioh jingkren na u ma H.H. Mohrmen.
Ia ka jingialang ha katei ka sngi la pyniaid da u ma J. Pyrtuh uba dei ruh u Dalloi jong ka Elaka Amwi bad ha kajuh ka por ula kyrkhu kyrdoh ia ki VDP ka Moosakhia ba kin long ki ba trei shitom bad kim dei ban sngap ia ki jingpynshoi na kiwei pat.
Ia ki kyntien pdiang sngewbha la ai da u ma D. Suting uba dei u Waheh Shnong ka Moosakhia bad ia ki kyntien ai khublei la ai da u President ka VDP shnong Moosakhia.
Ha kane ka juh ka sngi la don ruh ka jingialehkai Football ba la pynlong hapdeng ka Sohmynting pyrshah ia ka Jarain FC.
La pynlong ruh ia ka FETE shnong na ka bynta ban pynmih pisa ia ka VDP.
