Ka Joint Action Committee (JAC) kaba kynthup ia ka seng FKJGP, MPUF, JSU bad JPWO, kiba hap hapoh ka Nartiang Circle, mynta ka sngi hadien ka jingjurip ia ka skim jong ka Development of Infrastructure for Pilgrimage hapoh ka Prashad Scheme ha Nartiang Shakti Peeth (Mandir), kaba la wan lyngba ka Department jong ka Tourisim, kam shym la long kaba sei soh satia. Kat kum ka jinglap jong ki nongialam ka JAC ryngkat ka Dorbar Shnong Nartiang, ki la ong ba ia ka jingpyntrei la ai ha ki katto katne ngut ki contractor na ki bynta ki jingpyntrei bapher bapher bad dei ban pyndep hapoh 18 bnai naduh ba la pynmih ia ka work order, hynrei kumba long mynta tang katto katne eh ki jingtrei ba la lah pyndep, don kiba sah shiteng bad don ruh kiba ym pat shym sdang satia ia ka jingtrei.
Na ka liang u Chairman JAC u ma Bin Raliang bad Secretary ma Chalester Myria, hadien ba la kut ka jingbuh por ia ka jingpyntrei ia kitei ki jingtrei la lap ba bun kiba dangsah. Ki la ong ba hadien ba ki la pan da ka RTI ki la lap ba na ki 12 tylli ki jingpyntrei kiba kot haduh 489.85 lakhs, tang 4 tylli eh kiba la dep kiba kynthup ia ka Temple Gate (2 tylli), ka Public Convenience, ka Viewers Gallery bad ka multipurpose Pilgrimage, katba ka jingpyntrei ia ka Parking ka Nartiang Monolith Walk Development ki dang dep tang shiteng ka jngpyntrei bad kiba sah kiba kynthup ia ka jingpyntrei ia ka Site development bad landscaping, Um dih, jaka bret ñiut, ka Resting Shed (2 tylli), ka Illumination jong ki Mawbynna (Monolith) Nartiang bad ka Nartiang Shakti Peeth ki dei ki bym pat shym wat tang ban sdang ruh.
Shuh shuh ki la iathuh ruh ba ka liang ka JAC kumjuh ruh ka Dorbar Shnong Nartiang, ha kine ki sngi kiba la dep kila dep ki la leit ban ai ia ki shithi halor kane ka jingbym lah ban pyndep thikna ia ka jingpyntrei ia katei ka skim, ki la ia ki shithi wat sha u Managing Director MTDC, Ltd, Shillong Meghalaya, ha u Commissioner & Secretary jong ka Tourism Department, ha u Lat ka jylla bad ruh ha u Deputy Commissioner jong ka WJHD, hynrei ki la ong ba kim pat ioh kano kano ka jubab halor kane.
Kumta hynne ka sngi na ka liang jong ki nongialam jong ka Joint Action Committee, kila kyntu jur ia ka Department ba dei peit ia kane ka kam ban kin shim khia ha ka ban pyndep ia kane ka jingpyntrei ia ka Prashad Scheme ha Nartiang Shakti Peeth, da kaba ki la ong ba kim kwah ban shu iohi ia kine ki jngpyntrei kiba shu sat teng tang na ka bynta ka jingmyntoi jong ki katto katne ngut.
