Ka Annual Sports Meet ba ar sngi jong ka Indian Catholic Youth Movement (ICYM), Jowai Diocese kaba la sdang ha ka 15 tarik bad kut ha ka 16 tarik jong une hi u bnai da ka jingwan sakhilang ki Samla Rangbah ka Balang ba kynthup ia u Lovely Shylla, Symbud Rangbah Shnong Wahiajer kum u kongsan bad kiwei de ki riew rangbah ka Balang Katholik na ki Parish bapher bapher.
Ha ki ar sngi jong kane ka Sports Meet ki khun samla ka Balang na ki 18 tylli ki Parish ka rilum Jaintia ki la wan ban iashimbynta shongshit bad pyni ia la ki sap ki phong ba ki don lyngba ki jingiakop bapher kum ka Athletic, Football, Basketball bad kiwei kiwei.
Ha ka jingialang ba lyngkot jong ka sngi pynkut ia kane ka Sports Meet 2021, u Samla Mutshwa Thabah, President ICYM, Jowai Diocese u la kren pdiangburom ia baroh kiba lawan ban sakhi pynshongshit ia kane ka Sports Meet bad ruh ia ki nongiashimbynta ha ki jait iakop bapher katba u Lovely Shylla, Symbud Rangbahshnong Wahiajer kum u kongsan u ai ki kyntien pynshlur bad ai mynsiem ia ki khun samla ka Balang Katholik.
Ki Parish kiba la ioh ban rah nam ha kane ka Annual Sports Meet ki kynthup ia ka Parish Umkiang kaba long ka lahduh ha ka Football da kaba pynliem ia ka Parish Lumshnong lyngba ka Tie-breaker, ka Jowai Parish kaba la rah nam ha ka Basketball jong ki kynthei da kaba pynliem ia ka Khliehriat Parish bad ka Jalaphet Parish ba long ka lahduh ia ka nam Best Discipline katba ia ka nam jong kane ka Annual Sports Meet larah da ka Mynsngat Parish kum ka Parish baioh bun point duh ha baroh ki jaitiakop shynrang bad kynthei.
Ki arngut pat ki khun samla batbit tam jong kane ka Annual Sports Meet 2021 kiba laioh ban rah ia ka nam Best Athlete jong kane ka yakop mynta u snem ki long ka Fatima Dkhar, Nangbah Parish na ka liang ki kynthei bad u Claminus Biam, Barato Parish na ka liang ki shynrang.
