Ka ‘‘Halfway Home for Rehabilitation of Person Living with Mental Illness’ kaba don ha Sabahmuswang
U Deputy Commissioner ka West Jaiñtia Hills District u bah B.S. Sohliya mynta ka sngi ula plie ïa ka jaka sah shipor kiba shah ktah ha ka jingmut jingpyrkhat kaba la ai kyrteng ka ‘Halfway Home for Rehabilitation of Person Living with Mental Illness’ kaba don ha shnong Sabahmuswang WJHD, ïa kaba yn khmih bad peit da ka Society for Urban & Rural Empowerment (SURE) lyngba ka jingïarap pisa jong ka Directorate of Social Welfare jong ka sorkar jylla.
Hashwa ban plie la don ka jingïalang kaba lyngkot ha khrum jong katei ka Building, ha ka jingdonlang naduh u kongsan bah B.S. Sohliya, ka kong C.D. Lyngwa Director Social Welfare Department, kong J. Synnah District Social Welfare Officer, ka DSP kong W.C. Lyngdoh, u Secretary ka SURE Dr. H.H. Mohrmen, ka Dr. A.N. Pasweth, ki nongtrei jong katei ka Halfway Home bad kiwei de.
La pynsngew ba kane ka jaka sah kan pdiang kyrpang ïa kito ki nongpang kiba dang mih na ki jaka sumar kum na SANKER bad hashwa ba kin leit phai sha ïing ki dei ban hap ïoh shwa ïa ki rukom ai jinghikai ïa ki naduh ki jait jingshna, ki Counseling, ki dawai dih ba la bthah da ki doctor hapoh kane ka Halfway Home kaba don ïa ki nongtrei (Staff) haduh 16 ngut.
U bah Sohliya ula ong mynta kila don ki lad ba biang ban ai jingsumar ïa kito ki briew kiba pang ha ki jingmut jingpyrkhat, ym shuh kumba long ha ki por mynshwa kiba long kum ki along ban set sumar ïa ki, ula ai khublei halor ka jingsbun jong ka shnong Sabahmuswan ban tei ïa kane ka jaka sumar bad kane ka long ka nuksa ïa kiwei de ki shnong.
Ula kular ba na ka liang ka bor District, ka Social Welfare bad ka SURE kin ïaleh shitom kumno ban pynbha ïa kane ‘Halfway Home’ da ka jingïamir jingmut lang, khnang ba ki nongtrei kin ïoh mynsiem ban trei ïa ka kam bad u kyrmen ba kan long ka nuksa ba bha ïa kiwei de ym tang hapoh ka District hynrei ha ka jylla hi baroh kawei, ula ong.
U Dr. H.H. Mohrmen ula ai ka jingïaroh ïa ka ophis Social Welfare kala la ïarap ban pynïoh ïa ka jaka ba biang ban shna ïa kane ka ‘Halfway Home’, ula ong ba ïa kane ka Project ka dei ban leit sha Tura hynrei lyngba ka jingtrei shitom jong ki ophisar la lah ban wanrah ïa ka hapoh ka West Jaiñtia.
Ka kong C.D. Lyngwa Director Social Welfare Department ha ka jingkren kala ong lyngba ki nongtrei jong kane ka Halfway Home kiba la jied ïa kane ka kam kan long shisha ka jingkyrkhu na ka bynta kito kiba donkam jingïarap na kane ka jaka.
Hadien kane ka prokram u kongsan ha ryngkat ki ophisar kila leit jngoh ïa ki kamra sah kiba don hapoh ka Halfway Home kaba kynthup naduh ka ophis, ki jingthiah, ki jaka sum, jaka bam nalor kiwei de.
