Ka ophis District Agriculture Officer West Jaiñtia Hills District ha kane ka sngi saitjaiñ jong ka 16 tarik u Risaw kala rakhe ïa ka sngi ‘World Food Day’ ha ka shnong Shangpung Moolibang, halor ka phang “Our action are our future, better production better nutrition better environment better life”. La pynlong ïa kane ka prokram shi bynta na ka jingrakhe ia ka jingïoh laitluid ba 75 snem jong ka ri India.
Na ka liang ki nongrep jong katei ka thaiñ kiba la wan sha kane ka prokram ban ïoh jinghikai halor kumno ban pynkiew ïa ka rep ka riang tynrai khamtam ha ki thaiñ nongkyndong. Ha ka juh ka por la kyntu jur ïa ki nongrep ba kin mlien ban rep ïa ki jingthung tynrai khlem da pyndonkam ïa ki sboh dawai namar kine ki jingthung tynrai ki long kiba bha bad kiba ïaineh slem haka rep ka riang. La ai jinghikai ruh ïa ki nongrep ba kin ym dei ban ieh shrah ïa ka jaka rep hadien ba la dep ban thung, hynrei ki dei bad rep sa da kiwei de ki mar rep kiba long katkum ka por khang ba kato ka jaka kam long kaba leh nohei.
Ia ka jingialang la pyniaid da u District Agriculture Officer WJHD Jowai ma D. Pyrbot uba la ai ruh ki kyntien pdiang ïa baroh, ula ong ïa kane ka sngi la buh kyrpang ban rakhe mynta ka 16 tarik ha kylleng shi tyllup ka pyrthei lyngba ka United Nations Food and Agriculture Organization naduh u snem 1979, hynrei namar ka jingdon jong ka khlam Covid-19 mynta u snem la rakhe ïa ka katkum ki kyndon SOP jong ka sorkar.
U kongsan ma Richard Langbang Waheh Shnong ka Shangpung Moosyiem haba ai jingkren ha kane ka sngi ula ong lada khlem ki nongrep ‘ngin ym lah ban ïoh ïa ka bam ka dih’, kumta u buh ka jingkyntu ïa ki nongrep ba kin pynmih khambun ki mar rep napoh kane ka thaiñ khnang ba yn lah ban shalan sha kiwei de ki jaka ki bym don ïa jaka rep ba biang.
Ula pynsngew dei ban kheiñ kor ïa ka jingbam da kaba ym dei ban pynsepei ïa ka bad u khot ïa ki nongrep ba kin leit mih sha ka tnad ka rep ka riang ban ioh ia ki jingdonkam jong ki ha ka liang ka rep ka riang.
U Senior Scientist & Head KVK Jaiñtia Hills Dr. D. Paswet ha ka jingkren ula ong ka jingpynmih ïa ki mar bam ka long kaba donkam eh haduh katta katta namar kumba ïohi mynta ki dang don ki mar rep kiba wan poi nabar jong ka jylla, kumta u kyntu ba dei ban pyndonkam biang ïa kito ki hali hadien ba la dep ot ïa u kba.
Ha ka juh ka por u ai jingmut ïa ki nongrep ka thaiñ ba kin pyndonkam ïa ki jaka lum na ka bynta ban rep ïa ki mar kumu kubi bad phul kubi kiba lah ban thung ha ki por lyiur, ula ai nuksa kum sha ki thaiñ Khasi ki juh rep ïa kine ki mar da kaba shalan wat shabar jong ka jylla bad kane long kawei na ki lad kamai.
Katba ka kong Rida W. Rngad Horticulture Development Officer Laskeiñ Block haba ai jingkren sha ki nongrep kala pynsngew ïa ki nongrep la khot ki ‘Food Hero’ namar khlem ma ki ym lah satia ban pynmih ïa ki mar bam.
Na ka bynta ban pynbha pynmiat ïa ka mariang ym dei ban pom pathar ïa ki dieng ki siej kaba lah ban ktah kumjuh ïa ki jaka rep na ka jingkyrduh um, ki dieng ki siej ki lah ban kjit ïa ka um ha ka por slap hynrei khlem ki dieng ki siej ka um kam lam ban ngam shapoh ka khyndew, ong ka kong Rngad.
Na ka liang ki nongrep la ai jingkren na ka kong June Suchiang kaba la ai ka jingïaroh ïa ka tnad jong ka rep ka riang kala la ju pynlong naka por sha ka por ïa ki prokram ai jinghikai bad kan long ka jingmyntoi ïa ki kum ki nongrep ban kin nang ïai bteng ïa ka kam rep kam riang.
Kiwei de kiba ai jingkren ki kynthup na ka ophis ATMA Jowai, katba ïa ki kyntien ai khublei ha kane ka sngi la ïoh na u ma L.J Niang SDAO Amlarem.