Ki Pulit jong ka Raliang Police Out Post hadien ba la ïoh ïa ka ejahar na kiba haïing halor ka jingshahleh beijot kawei ka longkmie ba 70 snem tam ka rta, kaba la jia ha ka shnong Thangrong, West Jaiñtia Hills District kaba don ha ki jaka khappud, mynta ka sngi kila ioh ban kem noh ia utei u runar ba donkti.
Na ka liang ki Pulit jong ka Raliang POP kila leit kem noh ïa utei u runar ba donkti ha kane ka kam ïa uba la tip kyrteng kum u Pressor Tron uba don 50 snem ka rta bad uba dei ruh u nongkarbi uba sah ha katei hi ka shnong Thangrong. Ïa une u runar la pynngad hapoh ka kyndon 376 IPC bad ka jingtohkit ïa u ka dang ïaid shaphrang ïathuh ka tyllong khubor na ki Pulit.
Hashwa kane kawei na ki seng longkmie hapoh ka shatri jong ka STIEH jong ka Moojem Unit, ha ka sngi nyngkong kila leit hiar ban lap ïa ka jingshisha halor kane ka jingjia ba sngewsih ïa katei ka longkmie (tymmen) ba shah thombor ha u Pressor Tron ha ka 13 tarik u Jylliew, 2023. La ong ruh ba katei ka longkmie ka dei ruh briew kaba don jingduna ha ka rukom ïaid bad bym lait bha ban kren.
Shuh shuh katei ka tymmen hadien kane ka jingshah thombor kala pyrshang ban ïathuh ha ki khun, hynrei kim sngewthuh bha tad haduh ba ila thiah pang bad kila sdang ban wad ïa ka daw jong ka jingpang. Ha ka jingtohkit da kiba ha ïing kala ïathuh ha ki da kaba shuh pyni dak da ki kti namar ba kam lah ban kren na ka daw jong ka jingshitom kaba la bat da ki katto katne snem. Halor kane ka jingjia ka STIEH ka la pynrem jur ïa kane ka kam sniew jong utei u runar pyrshah ïa katei ka tymmen briew bad la kyntu jur ïa ki bor pulit ba kin pynshitom tyngeh ïa u katkum ka kyndon aiñ.