Hynnin ka miet jong ka sngi Thodieng hadien ka jingioh jingtip ba tikna ki Pulit ka EJHD, ba don kawei ka kali Santro kaba don ia u registration Number Tripura, kaba la suba jur baka kit ia ki jingkit kiba long beain kaba wan na ka thain Umkiang ban liet sha thain Khliehriat.
Kumta na ka liang ki pulit ka East Jaiñtia Hills, ki la pynlong ia ka jingap shrip ia kane ka kali ha Umtyra ha kaba ki pulit ki la pynlong ia ka jingkhynra ia kane ka kali Santro kaba don ia u Number TR-04A-0254, ha kaba ki pulit ki la lap ia u bhang ne kynja uba khia haduh 51.03 Kilograms bad hapoh kane ka kali don saw ngut ki briew kiba la tip kyrteng kum u Amit Mog 29 snem uba na Panisagar, North District Tripura, u Rajesh Kumar Keang 33 snem uba na West Tripura, u Babu Mog 38 snem ka rta na Panisagar, North District Tripura bad u Sanjit Debarma 42 snem uba na West Tripura.
Ki pulit la ioh kurup ruh 5 tylli ki Mobile Phone bad ka pisa kaba 13,540 tyngka bad la bat ruh ia katei ka kali kaba kitei ki saw ngut ki pyndonkam.