Ka Movement For Change, Meghalaya, India bad ka Dorbar Chnong Pammanik West Jaiñtia Hills District, ha kane ka 1 tarik kila pynlong ïaka jingïalang sngewlem ne ka ‘Condolence Meeting’ halor ka jingshah pynïap beiñ jong kawei ka longkmie ka (L) Rodit Langstang kaba naka shnong Pammanik hi.
Ïa kane ka Longkmie kaba 44 snem la pynïap da u kurim jong ka hi U Roibiang Pakma haka 31.5.2023 ha iing sah jong ki hi. Daka jingïarap jong ka kynhun Movement For Change lem bad kiba ha ïing jong kane ka lanot kila leit u jor pyrshah ïa une u runar ha Phramer Traffic Cell haka 3.6.2023. La ïoh kem ïa une u runar haka 26.6.2023 haka shnong Mynsoo-B daka jingïatrei lang jong kane ka Dorbar Shnong.
Ha kane ka jingïalang la ïashim bynta daki khynnah skul bapher bapher kiba don hapoh ka shnong Pammanik lem, ki nonghikai jong kine ki skul bad ki paid nongshong shnong kynthei bad shynrang.
Ïaka jingïalang la pynlong ha Community Hall jong ka shnong bad bud saka jingïaid rally na Community Hall shaduh sha ïing jong kata kaba shah pynïap. Ha ïing jong kane ka lanot la pynlong ïaka jingïalang lyngkot bad ka jingthang Mombati sngewlem daka khun kynthei jong ka, kiba ha ïing hasem bad ki paidbah. Kane ka lanot ka iehnoh shadien ïaka khun kynthei ba marwei jong ka.
Ki nongkren kiba kren hakane ka sngi ki kynthup ïa ka kong Yoophika Langstang naka liang ka kur Langstang, ki nonghikai naki skull kiba don haka ne ka shnong, ka President Village Organisation jong ka shnong Pammanik ka kong Fecility Dhar, u ma P. Lyngkot, u ma P. Samaiang bad u ma C. Sungoh .
Kine ki nongkren baroh ki pynrem jur ïa une u runar uba nud ban pynïap wat ïala ka jong ka kurim. Kumta la kyntu bad dawa ruh ïaki bor jong ka aiñ ba kin pynshitom ïa u ne u runar kat kum ki kyndon jong ka aiñ da kaba sdien phasi lane set phatok shi jingim.
Ïa kane ka khubor la phah da u Pherdian Samaiang President bad ka kong Z. Thaite Secretary jong ka Movement for Change.
