Ka tnat jong ka Ministry of Environment, Forest & Climate Change jong ka sorkar India kala pyrkhing bha ia ka jingpyndonkam ia ki kynja plastic. Ka Ministry kala pyntip ba wat ia kito ki plastic kiba lah ban pyut ruh la dei ban da ioh shwa da ka syrnot na ka tnat Central Polution Control Board (CPCB) ha shwa ban shna ia ki ha ki Karkhana ne pynmih ban khaïi ia ki. La bthah ruh ia ki nongpyndonkam plastic ba ki dei ban pyndonkam tang ia kito kiba la shah da ka sorkar.
Ha kaba iadei bad kane na ka liang ka sorkar Jylla lyngba ki bor District bad Sub-Divisional Officer (Civil) ruh kila hap ban bud bad pyntreikam ia kane ka kyndon. Kumta na ka liang jong ki bor pyniaid jong ka Amlarem Civil Sub-Division, West Jaiñtia Hills District lyngba ka SDO (Civil) kala pyntip ba hapoh Amlarem ruh kane ka hukum kaba la pynmih da ka tei ka Ministry kan treikam mardor. Kumta la khang ia ki riew paidbah ban pyndonkam ia ki plastic kiba don ka jingthew kaba duna ia ka 120 micron.