Ka San Shnong Development Organization (SSDO), West Jaiñtia Hills District kaba kynthup ïa Barato, Mukroh, Saba, Maitdein bad Iongkynshur ha kane ka 16 tarik mynta u bnai ka la leit aiti da ka dorkhas ha u MLA ka 4-Mowkaiaw Constituency ma Nujorki Sungoh kum ka jingpynkynmaw biang halor ki mat jingdawa kiba dang sah teng haduh mynta ha ki thaiñ Khappud.
Ka SSDO lyngba u Chairman bad u Secretary ki la dep ban ujor ha u Deputy Commissioner ha ka 27.04.2021 halor ka jingtei beaiñ jong ka sorkar Assam ïa ka Police Out Post ha ka jaka (Langhong-Sangdathli) kaba hap hapoh u pud u sam jong ka shnong Saba WJHD.
Ïa kane ka juh ka jingdawa la dep ruh ban pyntip ha u Myntri Rangbah ka jylla ha ka jingdonlang u MLA ka thaiñ kaba la long ha ka 24.06.2021 bad na ka liang u Ryntri Rangbah ula kular ban weng noh mardor ïa katei ka Police Out Post, hynrei haduh mynta ym shem la ïohi ïa kiei kiei ki dak ki shin ba ka sorkar jylla ka la leh ban tuklar ne weng noh ïa katei ka out post.
Ha katei ka dorkhas la dawa na ka sorkar jylla kan pynbeit noh kloi ïa u pud u sam namar naduh ba ka sorkar Assam bad ka Meghalaya kila weng noh ïa ka Status Quo, la ïohi ïa ka jingthombor jong ki briew ka Karbi kaba la wanrah ïa ka jingthut ha ka liang ka shongsuk shongshngaiñ bad na ka por sha ka por ki briew ka Assam ki la bteng ïa ki kam pyntriem ha ki thaiñ khappud.
Halor kitei ki mat jingdawa ka SSDO ka kyntu jur ïa u MLA ba un shim khia ïa kane ban lum lang ïa baroh ki nongshong shnong kiba hap ha ki thaiñ khappud jong ka Block:I – II, khnang ba yn ïoh ban ïa pynbeit ha kano ka rukom ban ïoh ïa u pud u sam uba pura.
Ha ka juh ka por ka SSDO ka kyrpad ïa ka sorkar jylla ba kan pynkloi ban buh ïa ki Police Out Post ha katei ka thaiñ khnang ba kan long ka lad jingïada ïa ki paidbah nongshong shnong ka jylla kiba don ha khappud bad ka Assam. Ha ka juh ka por ka San Shnong Development Organization ka kyrpad na u MLA ba un ïakren bad ka sorkar jylla ba kan wanrah ïa ka Meghalaya Rural Bank ha kitei ki thaiñ namar kumba long mynta ki paidbah jong kane ka thaiñ kila donkam ban don noh ïa ka Bank ban pynsuk ïa ki ha ka liang ka pisa pilaiñ.