Ka IIM, Shillong mynta ka sngi kala rakhe ia ka jingdap 16 snem ka jingai jingshakri jong ka ha ka liang ka pule puthi hapoh kane ka Jylla Meghalaya.
Hapdeng kine ki 15 snem bala leit ka IIM Shillong kala lah ban ai ia ki jinghikai bad ki jingwadbniah, ryngkat ka jingiasnohkti lang bad ki skulbah (University) kiba pher bapher na kylleng ka pyrthei.
Mynta ka sngi u nongioh khusnam Padma Shri u Jadav Payeng ia uba la ju tip kum u ‘Forest Man of India’ ula long u kongsan.
U kongsan ula pynkynmaw ba 42 snem mynshwa ula thung ia ka khlaw kaba la tip ka Molai Forest mynta kala kylla long ka ïing jong ki 115 tylli ki hati, ki khla bun jait, ki rhinoceros bad kiwei pat ki mrad khlaw.
Kane ka khlaw kala khring ruh 80 % ki jait sim ba wan poi na kiwei pat ki jaka (migratory birds).
Ka jingkhwa ne jingphohsniew jong u Payeng ka long ban pyniasoh ia kane ka khlaw Molai bad ka Kaziranga National Park kaba don ka jingjngai kaba 60 kms bad mynta kane ka jingthmu ka dang iaid shakhmat.
U Payeng ula batai ruh shaphang ka jingdonkam ban thung ia ki dieng Sandalwood namar kine ki jait dieng ki lah ban wanrah ka jingmyntoi namar ki long kiba rem dor.
Kiwei de kiba ai jingkren ha kane ka sngi ki kynthup ia u Prof. D.P. Goyal uba dei u Director ka IIM Shillong.
Ha kane ka sngi la don ruh ka prokram thung dieng kaba la ialam da ki samla pule jong kane ka jaka pule bad iashim bynta da baroh kiba la poi sha kane ka prokram.
Ia ka jingrakhe jingdap 16 snem jong ka IIM Shillong la pynkut ha ryngkat ka jingkut jingmut ban pynlong ia kane ka Planet kaba jyrngam na ka bynta ka lawei ban wan.
