Ka shad Behdeiñkhlam jong ka Seiñ Raij Jowai mynta ka sngi kala poi sha ka sngi kaba lai (Musiang), ha kaba ki khon Raij kila leit rah ïa ka ‘Symbood Khnong’ na ïawmusiang Loom Sooiung ban leit pynïeng ha khlieh shnong (Chilliang Raij).
Katba ha ka por shiteng sngi ki Kmai Raij kila pynlong ka jingïakynduh ha Mynkoi Pyrdi (Iaw-iongpiah) ban pynhiar ïa ki bom ki Bhuri, bad leit sha ka jaka Datlawakor bad sha ki baroh ki jaka ñiam ha Iawmusiang.
Nangne ki khon ka Raij kila leit pynpoi ïa ka ‘Khnong Blai’ ha madan Poh Sawiar khnang ba u Dolloi un ai ka pyrnah Khnong Blai ha u Kñi Nikhla ban pyndep ïa ka ñiam ka rukom da ka nguh ka dem bad ka ‘suit ka choor’.
Lashai 9 tarik kaba dei ka ‘Muchai’ ka sngi kut jong ka lehñiam Behdeiñkhlam ka Seiñ Raij Jowai mynta u snem 2023, ha kaba yn wanrah ïa ki rong ki rup (Rot) ba la shna na ki dong bapher bapher kiba ki don ia la ki khubor jingsneng jingkyntu ia ka imlang ka sahlang. Ia kine ki Rot yn sa leit bret ha ka pung jong ka Syiem Aitnar.
