Ka East Jaiñtia Hills District Level Inter-School Subroto Mukherjee Cup Football Tournament, 2023 kala pynkut noh ïa kane ka lympung ïalehkai jong ki khynnah skul haka kyrdan Under-14 (boys) bad ka Under-17 Boys & Girls.
Ïa kane ka lympung la pynïaid da ka East Jaiñtia Hills Sports Association ha madan Dienchynrum, East Jaiñtia Hills District. Ha kaba la wan ban sakhi naduh u Deputy Commissioner ka East Jaiñtia Hills District, Khliehriat u A. Baranwal, IAS kum u kongsan bad i Halen Nongtdu, Captain U-20 Indian National Football Team kum Special Guest.
Ha ka jingïakhun phainal ha ka kyrdan U-17 boys ka Rymbai Presbyterian Higher Secondary School, kala pynliem da 2-1 kol ïa ka Wapung Higher Secondary School.
Ha ka kyrdan U-17 (Girls) ka Khliehriat Higher Secondary School kala pynliem da 1-0 kol ïa ka Lotus Secondary School, Dienchynrum.
Katba ha ka kyrdan Under-14 Boys ka K.B Memorial Secondary School, Wapung kala pynliem da 3-1 kol ïa ka Chiehruphi Secondary School lyngba ka jingïashut tie-breaker bad long syndon ka lahduh.
Lyngba kane ka jingjop jong na ka District kine ki lai tylli ki skul kata la Rymbai Presbyterian Higher Secondary School, Khliehriat Higher Secondary School and K.B memorial Secondary School Higher kin leit mihkhmat sha ka State Level Subroto Cup Football Tournament, 2023 ha Shillong ha ka Under-17 Boys, Under-17 Girls bad Under-14 Boys.
Ïa ki khusnam sha ki nongjop la sam da u kongsan ïa ka nam Best Player la ïoh da u Bisterly Ksih ka Rymbai Presbyterian Higher Secondary School ha ka Under-17 Boys, ka Filicia Sympli na ka Khliehriat Higher Secondary School kala ïoh ïa ka nam Best Player ha ka Under-17 Girls bad u Lyonel Ryngkhlem ka K.B Memorial Secondary School u la ïoh ïa ka nam Best Player haka kyrdan Under-14.
Kiwei de kiba ïadonlang ki kynthup ïa u F. Bareh, MDC 23- Rymbai- Khliehriat Constituency, District Sports Officer, kong Stephanie Rapsang, ma C. Tlang, General Secretary, East Jaiñtia Hills District Sports Association, ma J. Sutnga, Working President, East Jaiñtia Hills District Football Association nalor kiwei de.
