Ka Lehniam shad Behdeinkhlam ka Sein Raij Jowai kaba ju long manla u snem, mynta u snem kala sdang naduh ka 6 tarik bad kut noh mynta ka sngi 9 tarik sngi Muchai, hapdeng ka jingshongshit shongkun bad ka jingiphuh iphieng ha ka jingsakhi ki hajar ki paidbah ba kylleng ki bynta jong ka ri Khasi Jaiñtia bad nabar ka Jylla ruh de.
Mynta ka sngi la wan ban sakhi ia kane ka lehniam Behdeinkhlam da u Lat ka jylla Meghalaya u Phagu Chauhan uba long kum u kongsan, u Chief Justice ka Meghalaya High Court u Sanjib Banerjee, u MLA ka Khliehriat uba long ruh u myntri ka sorkar jylla u ma Kyrmen Shylla, u MLA ka North Shillong bah Adelbert Nongrum ha ka jingdonlang u President Seinraij Jowai OR Challam, u Secretary ma Arwot Sumer, u Doloi na ki Elaka bapher jong ka Jaintia, SP, DC, WJHD, ki MDC JHADC ryngkat da ki hajar ki paidbah na kylleng.
Ka bynta ba kongsan tam ka Lehniam ka la sdang ha ka nohphai sngi ha Aitnar- ka pung bakyntang. Ha kane ka jaka ka Behdeinkhlam kala sdang da ka jingwan ki Wasan hapoh ka jingialam u Pator ban pynlong ia ka nguh ka dem ia ka Syiem Aitnar bud pat sha ka jingwanpoika Symbud Khnong Blai. Hadien ka jingwan poi ka Symbud Khnong Blai, ki khon ka Niamtre ki la hiar ban shad ha katei ka pung ktieh ba kyntang.
Ki dong bapher bapher kynthup ia ka Panaliar, Dulong, Chilliangraij, Loomiongkjam, Loomkyrwiang, Iongpiah nalor ka Sein Raij Shillong, Sein Ummulong bad Ka Sein Tylli Niamtre Ladthadlaboh, Seng Khasi ki la wanrah ia ki rot jong ki ha ki dur ha ryngkat ka khubor sha ki paidbah.
Na ka liang u Governor kumjuh ruh u Chief Justice bad baroh ki nongkren ki la ai khublei kyrpang bad kitbok kit rwiang ia ki khun ka SRJ bad ia ka jait bynriew hi baroh kawei ba kin ioh ka koit ka khiah ka kamai kajih ba dap ba biang.