Ka East Jaiñtia National Council (EJNC) bad ka Jaintia National Council (JNC) mynta ka sngi ki la pynlong ia ka jingialang ba kyrpang ha Khliehriat West Community Hall, ha kane ka jingialang la pynlong ia ka jingiateh kular hapdeng kitei ki ar tylli ki seng bad ban thaw noh tang kawei ka kynhun kaba la tip kum ka Jaintia National Council (JNC) ka ban pynkhlaiñ shuh shuh ia ka jingshakri ia ka ri Lum Jaiñtia bad ia ka jaitbynriew Hynñiewtrep baroh kawei.
Ia ka jingialang mynta ka sngi la pyniaid da u ma Damonmi Dkhar bad la ioh ki kyntien pdiang burom na u Vice President EJNC ma Ency Shadap, katba ia ka jingpynbam smai ia ki dkhot thymmai ka JNC-CEC la ioh na u bah Robert June Kharjarin uba long u President rangbah ka Hynniewtrep Youth Council.
Ha kane ka sngi la ioh ruh ia ki jingpyni ia ki jingiaid lynti jong ka seng EJNC, ha kaba la ioh ruh ia ki jingkren na u President Rangbah ka Hynniewtrep Achick National Movement (HANM), u bah lamphrang Kharbani, u ba la kren halor ka jingthmu jong ka sorkar ban wanrah ia ka lynti rel hapoh East Jaiñtia da ka lynti rel ka dei ka lynti bah jong ki mynder ban wan buhai shong ha kane ka jylla, wat haba mynta tang ka lynti rel ym pat don ruh ka jingbun jong ki bar jylla kala long kaba ima.
La ioh ruh ki jingkren na u Dr. Phervision Nongtdu, Principal ka Eastern Jaintia College, uba la ong ba haba ngi ia khun ne ialeh ia kino kino ki jingialeh ngi dei ban don ka jingthoh ym tang ka ktien. U la ong haba ngi iakhih ia kino kino ki jingiakhih ka jingpynshai paidbah ka dei kaba donkam khamtam sha ki thaiñ nongkyndong kaba dang duna ka jingpyndonkam ia ki Technology khnang ba kin sngewthuh kaei ka jingmut jong ka jingiakhih ne ka jingdawa khang ki briew kin tip ban kin ai ka jingkyrshan.
Mynta ka sngi la ioh ruh ki jingkren na u President ka JNC u bah Sambormi Lyngdoh, General Secretary JNC u bah Wanshwa Suting, Vice President Nangjan Dkhar, President JSU Jershom Shylla bad kiwei de. La pynphuh pynphieng ia kane ka sngi da ki jingrwai tynrai jong ki kynnah samla jong ka thaiñ.
