Ka Meghalaya People United Front (MPUF) East Jaintia Hills District, ryngkat bad ka MPUF seng kmie hynne ka sngi hapoh ka jingialam u President EJHD u K. Blah ha ka jingdonlang u President sengkmie u bah Dawanpoimi Laloo lem bad ki dkhot ki la leit ai da ka jingthoh ha u Deputy Commissioner ka East Jaintia Hills District u Abilash Baranwal, IAS kaba iadei bad ka jingpyrshah jur jong ka seng ha ka jingiadei bad ka jingthmu jong ka sorkar ban pynpoi ia ka lynti rel hapoh ka jylla.
Na ka liang ki nongialam ki la ong ba na ka liang ka seng ka pyrshah jur ia kane ka jingthmu jong ka sorkar ban pynpoi ia ka lynti rel, ha kaba na ka liang ka jong ki, ki la buh ka jingkytu ia ka sorkar ba dei ban pynioh shwa ia ki aiñ iada ia ka jingwan rungkyrthep jong ki mynder hapoh ka jylla kum ka ILP. Namar haba mynta tang ka rel ym pat poi hapoh ka jylla ka jingwan rung jong ki mynder ka la long kaba jur bha.
Shuh shuh na ka liang ka seng ka la ong ba na ka por sha ka por ki la dawa bad buddein ha ka jingiadei bad ka jingwan rung jong ki bar jylla, kumta katba ka sorkar kam pat lah ban pynbiang ne pynioh ia ka jingiada ia ka jait bynriew hapoh ka jylla, kam patdei ban pynpoi ia ka lynti rel.