Ka Jaintia Students’ Movement (JSM) mynta ka sngi kala bteng ia ka jingiakhih jong ka da kaba pylong ia ka jingshong kyllaiñ myngngor ha ka sngi kaba lai sa ha phyllaw jong ka Jaintia Hills Autonomous District Council (JHADC) ban dawa na ka sorkar ban weng noh mardor ia ka khyrdop khrong khajna (Entry tax gate) na ka shnong Khanduli Weat Jaiñtia Hills District kaba la wan pynieng jubor da ki bor ka Karbi Anglong Autonomous Council (KAAC) naduh u bnai April mynta ka snem.
Mynta ka sngi la wan ban ai jingkyrshan ia ka JSM da ki nongshong shnong ka Khanduli kynthup naduh ki nongialam shnong bad ki seng longkmie jong ka shnong.
La iathuh kumba long mynta ki nongshong shnong ki shem jingeh shibun naka daw ka jingbym ioh lad shuh ban leit rep sha ki hali ki pynthor namar ka jingiakynat hapeng ki paid Pnar Khanduli bad ki Karbi.
Ki nongialam seng kila kren shai lada ka sorkar kam sngap ia kane ka jingiakhih kaba jar jar, na ka liang jong ki bad ki nongshong shnong ka Khanduli kin iakhih da kaba tyngeh naduh lashai ka sngi.
