Ka MIPF (Meghalaya Indigenious People Front) Jaiñtia Hill District ha ka 20 tarik mynta u bnai kala leit ban buh ia ka jingujor ha u Executive Engineer, PWD South Division, Jowai halor ka jingjot rathai ka surok ban poi sha Syntu Ksiar ha ka jingialam u Vice President samla Deibormi bad u Publicity Secretary samla Wadbhami Lathing.
Ha kane ka jingiakynduh ka seng kala buh ka jingdawa na ka tnat PWD ba ka dei ban shna pynbha noh ia katei ka surok kaba la pei thliew ha baroh shilynter. Ka seng ka pynkynmaw ba ka Syntu Ksiar kadei kawei na ki jaka leitkai pynngad jong ki ba bun ki briew ym tang na ki thaiñ Jaiñtia, hynrei naduh nongbah Shillong bad wat kiba na bar jylla ne bar ri ruh namar ha kane kajuh ka jaka u don u mot jong u Khlawait ka Ri Lum Jaiñtia u Woh Kiang Nongbah bad kumjuh ruh ka itynnad jong ki pyntha ka Wah Myntdu.
Ka seng ka pynpaw ba ha kine ki aiom Tlang kiba bun ki briew na kylleng ki jaka kin tuid sha Syntu Ksiar ban leitkai sngewbha, kan long ka jinglehrain ia ka District bad ia ka Department ruh kumjuh ban iohi ia ka jingsniew shaba palat katei ka Surok. Kumta ka Seng ka dawa ba dei ban shna ne maramot noh mar mar khnang ba kan ym wan rah jingeh ia ki paidbah.
