Ka Jaiñtia Students’ Union (JSU) bad ka Jaiñtia National Council (JNC) kila pynpaw ka jing pyrshah kaba jur halor ka jingkren jong ka Dr Mazel Ampareen Lyngdoh, Spoke Person jong ka Sorkar MDA 2.0, halor ka jing ong ka jong ka ba kito kiba pyrshah ïaka jingthmu jong ka sorkar jylla ban wanrah ïaka Railway shapoh East Jaiñtia Hills, ki dei ban pule bniah halor ka jingman jinglong jong ka Mendipathar Railway Station, kaba don hapoh Rilum Garo.
Kine ki ar seng kila ong haba ki pyrshah ïa kano kano ka jingthmu jong ka Sorkar Jylla, kam mut ba ki pyrshah ïaka Roi ka Par hynrei ki pyrshah halor ka nongrim ban ïada ïaka pateng jong ki longdien mandien, namar la ïoh i jngai ba lada ailad ïaka jingthmu jong ka Sorkar ban wanrah ïaka Railway shapoh EJHD kan buh ka jingma kaba khraw ïaki Trai Ri Trai Muluk, namar ba haduh mynta ym pat don ki Aiñ kiba khlaiñ ban ïada naka jingwan thyllep jong ki bar jylla bad ym pat don ruh ki Aiñ kiba khlaiñ ban ïada ïaka Kamai Kajih jong ki Trai Ri Trai Muluk.
Ka kyrwoh kaba shai kine ki ar seng ki kwah ban phah sha ka Dr Mazel Ampareen Lyngdoh bad shaka Sorkar Jylla ba kim donkam ban leit pule bniah ïa kita ki Railway ba don hapoh Garo Hills namar ki ïeng halor ka Nongrim kaba skhem ban pyrshah jur ïaka jingthmu jong ka Sorkar MDA 2.0 ha kaba ïadei bad ka jingthmu wanrah ïaka Railway shapoh EJHD. Pynkut ka kyrwoh na u samla Jersom Shylla President JSU – CB bad u Sambormi Lyngdoh President JNC – CEC.