Hadein ba ki pulit jong ka East Jaiñtia kila ioh ban kem ia ki ar ngut ki longkmie kiba donkti ban wanrah ia u Drugs, ha kane ka 16 July, 2023, hadien ba la ioh ia ka jingtip ba thikna ba don ar ngut ki longkmie kiba wan da ka kali kamai Sumo na ki thaiñ Silchar Assam, ban leit sha ka liang Khliehriat kiba la suba ba ki kit lang ia u Drugs.
Kumta na ka liang ki Pulit ka ANTF ryngkat ki pulit jong ka Khliehriat Police Station, kila pynlong ka jingap shrip ia katei ka kali Sumo ha kaba ki la ioh ban bat ia ka ha ka shnong Nongsning, East Jaiñtia, kaba don ia u number MZ-4A-2997 kumjuh ruh ia kitei ki ar ngut ki longkmie kiba la kit lang haduh 10 tylli ki synduk sabon ia kiba la thep hapoh ia u Drugs Heroin uba shongdor haduh T.1.6 klur tyngka uba khia haduh 197.35 Grams.
Kitei ki longkmie kiba kynthup ia ka Hoihoi Hanhal 35 snem ka rta kaba na Langol District, Imphal West, Manipur bad ka Lhing Hohoi 40 snem ka rta kaba na Langol District, Imphal West, Manipur. Ia kitei ki ar ngut ki longkmie la pynngat hapoh ka aiñ NDPS bad ia ka jingtohkit la pynlong da ka Khliehriat Police Station na ka bynta ban lap shuh shuh ia kiba donkti ha kane ka kam.
Hadien ka jingtohkit bniah ia kitei ki longkmie ki pulip ki la lap ksai ia kiwei pat ki lai ngut kiba donkti kiba kynthup kum u Khailen Hoakip 42 snem ka rta, ka Lheineihoi Hoakip 40 snem ka rta bad ka Ngal Rami Nano 28 ka rta, na Nongmensong, East Khasi Hills Dsistrict. Ia kine la leit rah sha PS Khliehriat na ka bynta ka jingtohkit shuh shuh ia ki.