Ka State Steering Committee kaba la shong jingialang ha ka 18 tarik mynta u bnai hapoh ka jingialam jong u bah D.P. Wahlang IAS, Chief Secretary ka sorkar Jylla ha ka jingiadon ryngkat ki Directors na ki tnat bapher bapher ba kynthup ia kiba na (MI, MCH & FW, R), ki nongtrei napoh ka Health & Family Welfare Department, National Health Mission, Social Welfare Department, Sports & Youth Affairs Department, Labour Department, Mining and Geology Department ryngkat ki Development Partners kum ka – WHO, UNICEF, UNDP& JSI. Kane ka Committee kala pynpaw ba kumba long haduh mynta ka Jylla Meghalaya kala lah ban ai injek ia ki khunlung haduh 89 %.
Kumta ban pyniaid shaphrang ia kane ka thong jong ka sorkar pdeng hapoh ka Intensified Mission Indradhanush (IMI) 5.0 ka committee kala shim ia ka rai ban bteng biang lai bnai lynter ia kane ka jingai injek ia ki khunlung kiba don ha ka rta 0-5 snem. Ka prokram kan sdang naduh u bnai August ha ki tarik 7-12, nangta ha u bnai September ha ki tarik 11-16 bad ha u bnai October naduh ki tarik 9-14 mynta ka snem 2023. Ka jingthmu ba kongsan jong ka sorkar ka long ban pynduh jait noh ia u khniang jingpang ñiangpyrshit ne uta u Measles-Rubella napoh ki jylla bad na ka ri India hi baroh kawei.
Lyngba kane ka prokram Intensified Mission Indradhanush 5.0, yn sa buh ruh ia ka Digital Platform kaba ai kyrteng ka U-Win, lyngba kane kan iarap ban register bad ban ai jingtip ia kiba donkam ban ioh ia kane ka injekshon, ia kane ka app yn pyntrei kam ha kylleng ki bynta jong ka India bad hangne ha ka Jylla Meghalaya ruh kumjuh. Ka Committee ka kyrmen ha hapoh u bnai Nohprah mynta ka snem yn sa lah ban pynpoi haduh 95% tam ka jingai injekshon ia ki khunlung hapoh ka jylla Meghalaya.
Ia kane ka prokram IMI 5.0 Campaign ym lam khmat shwa da ki ar tylli ki District kata ka West Jaiñtia Hills bad ka Ri-Bhoi District, hadien kata yn sa sdang sha kiwei pat ki District jong ka Jylla.
