Ka Jaintia National Council (JNC) hadien bala iohsngew ia ka jingkren jong u Myntri Rangbah ka jylla u Conrad K. Sangma halor ka jingiakhih ki ACHIK ban dawa winter capital da kaba ong ba ka lynti kaba jan tam kadei ka Mini Secretariat bad ia kane ka sorkar ka lah pynkhreh da kaba kham heh bad kham bha na ka bynta ban pynsuk ia ki nong Garo.
Na ka liang ka JNC ka sngew ban pynkynmaw ia ka sorkar ba ha u snem bala dep ha u December 2022, ka sorkar ka la dep ban plie ia u mawnongrim ban shna noh ia ka Mini Secretariat ha Jowai hynrei haduh mynta ym shym la paw satia ki dak ki shin. Hato kane ka dei tang ka jingpynbiej? Namar bala jan wan ka election buh jingkylli ka seng.
Ka Jaintia ha ka jinglum khajna (revenue) ka dei kaba pynioh bun tam ia ka jylla hynrei kaba sngewsih ka long ba maka kaba sahdien tam, kaba mut ba haduh mynta ka sorkar ka tip tang ban shim hynrei ban ai te em.
Ka seng ka pynkynmaw ruh ba aiu ka sorkar kala leh ha ka ba iadei bad ka Iawmusiang building complex kaba dei ka mat jingdawa ba lah slem tam, ki jingmang pisa tyngka ki iaid na ka por sha ka por hynrei iphylla ba haduh mynta dang sahteng ka kam. Ka seng ka buh jingkylli hato ka Jaintia kam don hok mo ban ioh ka roi ka par?
Ha kum kane ka por ka seng ka dawa ba dei ban pyndep noh shi syndon ia ki jingkular, pyndep noh kloi iaka Iawmusiang building complex, sdang noh ban shna iaka Mini Secretariat kumba lah khlei haka por ba plie mawnongrim, ym tang ban pynbiej election ia ki paidbah ne lehkai ia ka pisa kaba dei hok jong u paidbah.
Khatduh ka seng ka phah ruh ka kyrwoh kaba shai sha ka sorkar ba ym dei ban niewshiliang ha ka jingshna iaka Mini Secretariat, kumba la mut la thmu ban shna ha Tura ha Jowai ruh thik dei ban ai kumta. Pynkut ka kyrwoh na u Publicity Secretary JNC u Mebanteilang Sukhlain.
