Ka All Jaiñtia Labour Union (Organise and Unorganised Labour) ka pynpaw ka jingsngewnnguh ïa ka Dorbar shnong Caroline Colony kaba la kloi ban pdiang ïa ki 10 tylli ki tynrai dieng Cherry Blossom na ka bynta ban thung hapoh ka shnong. Ïa kine ki tynrai dieng la ai ha ka 22/7/2023 ha ka Community Hall ka shnong.
Shwa ban ai ïa kine ki tynrai dieng, la pynlong ka jingïalang kaba lyngkot ha kaba u Waheh Shnong ma E. Lyngdoh u la pdiang sngewbha ïa ki dkhot ka Union bad bad katto katne ki dkhot ka shnong naduh u Secretary ma P. Lamare bad u Chairman ka Environment Committee ka shnong.
La ïoh ïa ka jingkren lyngkot halor ka jingdonkam jong ki dieng, ka jingmyntoi ha kaba ïada, pynkhuid bad pynitynnad ïa ki shnong ki thaw bad ka mariang hi da u Waheh Shnong.
La ïoh ruh ïa ka jingkren ba kham bniah halor ki lad ba ka shnong kala shim ban ïada ïa ka mariang bad ka jingdonkam khamtam ban leh khuid hapoh ka shnong ka thaw da u Chairman ka Environment Committee ka shnong.
Haba ai jingkren na ka liang ka Union, u ma S. Pajuh (General Secretary) ula pynsngew ba ka jingïada ïa ka mariang ka long kawei na ki mat treikam ka Union bad ka Union nangne shakhmat kan pyntyllun ïa kane ka mat trei kam da kaba ïatreilang bad kino kino ki briew lane ki shnong ne ki seng treimon sngewbha na ka bynta ban thung dieng ha ki jaka kiba ka Union ka lah bad ïoh jingbit ban thung.
Ka Union ka kyntu ruh ïa ki paidbah baroh ban sumar lang ïa ka mariang da kaba sumar ïa kino kino ki dieng kiba la dep thung da kino kino ki briew ne ki shnong bad ki seng treimon sngewbha khnang ba kin heh kin san na ka bynta ka jingmyntoi ka imlang ka sahlang khamtam eh ban sngewthuh haba sumar ïa ki jingthung bad ban long ki briew kiba don jingkitkhlieh ha ka ban ban pynïoh biang ïa ka mariang kaba khuid ba suba.
Na ka liang ka Union la wan ban ia donlang da u President ma Kyrmen Siangshai uba la aiti ïa kine ki dieng ha u Waheh Shnong, u Joint-Secretary ma Leiwatphi Sutnga, Finance Secretary ma Miju Sutnga.