Ka Dorbar Elaka, jong ka Elaka Raliang kaba la long ha ka 24 tarik hapoh ka Dorbar Hall jong ka Shnong Raliang, da kawei ka sur kala rai ban pynneh pynsah ïa ka mei mariang bad ka sawdong sawkun hapoh ka Elaka.
Ia kane ka Dorbar la pyniaid da u Pa Daloi u C. Lyngdoh u ba long ruh u Chairman jong ka Dorbar Elaka. Ha kane Dorbar da kawei ka Sur kala shim ia ki kine ki rai harum.
Ban pynneh pynsah ia ka Meimariang bad ka sawdong sawkun:-
- Ka Dorbar Elaka kala rai ban khang pyrshah ha baroh kawei ka Elaka ba ym bit satia ban thang lum/thang khlaw mamar ka pynduh jait ia ki jingthung bad kiwei pat ki jingthaw ba im.
- Ym bit satia ba siat/ lane pyniap ia ki Sim ki Doh bad ki Mrad ki Mreng baroh.
- La rai ban iatreilang bad ka Tnad Forest khnang bad dup lah ban teh lakam ia ki ba ialeh pyrshah.
Ha kaba iadei pat bad ka Shongsuk shongsaiñ hapoh ka Elaka, khamtam ha ka por Election, na ka liang ka Dorbar Elaka ka la shim ia ka sienjam kaba bha tam kumne harum.
- Lakhang pyrshah ia ki Candidate ba ia leh Election (MDC/MLA/MP) ban wan ialap Election ha ka por Election sha baroh ki shong hapoh ka Elaka palat ia ka 4-tylli ki Kali rit kumba la ai jingbit da ka Election Commission, lait noh tang haka Rally.
- La khang pyrshah ia ki Candidate ba kim bit satia ban ai Ja lane kino kino ki jingdih pynbuaid lait na ka Sha, ia ki paidbah ha ka por ba ki wan ialap Election, ha ka por Election.
Ban pynskhem bad pynrking bha ia kine ki rai ba la shim ka Dorbar Elaka ka kyrpad bad btah ia ki Dorbar Shong bapher bapher ban pynbna Shnong shisyndon ia kine ki rai ka Dorbar Elaka bad ban ai ka jingiatreilang na ka bynta ka jingbha bad ka jingmyntoi jong ka Elaka baroh kawei.
Kane ka long katkum ka jingpynlait khubor na ka ma Rikut N Parien, Secretary Dorbar Elaka, Elaka Raliang.
