Ka tnat Pulit jong ka East Jaintia Hills District lyngba ka Ladrymbai Police Outpost, mynta ka sngi kala pyntip ba ha ka por mynstep kumba 5:30 ei ei kila lap ia ka met iap jong u wei u rangbah bym pat lah ban tip la u dei na ka jait bynriew aiu bad u dei na ka shnong aiu, ia uba la suba jur ba ula shah pyniap katkum ki dak ki shin ba paw na ka jingmynsaw bad ka jingshahteh ki kti jong u.
Ia une u rangbah la suba ba la pyniap na kawei pat ka jaka bad la wan ban bret ia u ha rud surok jong ka Ladrymbai by-pass. Ki Pulit kila shimti ia kane ka met iap bad kila pynkit sha SDM&HO, Civil Hospital, Khliehriat ban leh ia kaba donkam, bad ia kane ka met iap la buh mynta ha jaka buh met iap jong katei ka Hospital.
Na ka liang ki bor Pulit ki buh ka jingkyntu ia kino kino kiba ithuh ne don jingiadei bad une u rangbah ba kin wan ban shimti noh ia ka met jong u, lane Phone ha kane ka No.9862091578 (IC Ladrymbai).
Katkum ka jingiathuh jong ki Pulit une rangbah u don ka jingjrong kaba 5 phut 5 inshi, u don u shñiuh ba lyngkot, ka durkhmat kaba pyllut bad ka sniedoh kaba shai.
U phong da ka patlun jean ba iong, ka T-Shirt jyrngam-lieh bad ka patlunpoh kaba jyrngam.
Ki Pulit kila shimti ia ka case bad ka jingtohkit ka dang iaid shakhmat.
