Ki lai ngut ki Waheh Shnong kiba kynthup ia u Waheh Shnong jong ka Umkinang, Dona Skur bad Kuliang kila buh da ka jingujor sha u Inspector jong ka DMR Umkiang Check Gate halor ka jingkit palat pud jong ki truk Dumper kiba kit ia u Mawshun, namar kane ka lah ban wanrah ia ka jingmynsaw ki nongleit nongwan.
Ia kane kine ki Waheh Shnong kila leh namar ba kane ka jingkit palat pud jong kitei ki Dumper ka la buh ha ka jingma bad jingmynsaw ia ka iaid ka ieng jong ki paidbah nongshong shnong ka thaiñ, khamtam ia ki khynnah skul kiba iaid lyngba ia u surokbah NH-6. Namar ba don ki khep ki khep ba ki mawshun kiba la kit palat pud da kitei ki truk, ki hap sha ki bynta jong u surok bad kum kine ki jingjia ki lah ban wanrah ia ka jingjia ba sngewsih ha kano kano ka por, nalor kata na ka jingkit palat pud ka ju pynlong ruh ia kine ki Dumper ban ur ne kylla hapdeng surok bah bad kala wanrah ia ka jingsahkut kali.
Kumta kitei ki nongialam shnong kila buh ka jingkyrpad ia utei u ophisar ba un shimkhia ia kane ka kam ban khang shi syndon ia ka jingkit palat pud jong kitei ki truk Dumper kaba long ruh shi bynta na ka jingleh beaiñ jong ki bad kan pynlait ruh ia ka jingtieng jingsyier ia ki paidbah ba iaid ba ieng lyngba u ne u surok bah.