Ka ïing Bishar, Session Judge, West Jaiñtia Hills District ha ka jingshong bishar ia ka Case No.99 of 2015 bad halor ka jinglap ia ki sabut kiba biang kala rai pynrem ia ki lai ngut ki runar kiba don kti ha ka kam pyniap briew ba kin shah set phatok noh shi jingim.
Kine ki lai ngut kiba la shah rai pynrem ki kynthup ia u Tngen Muruh, u She Muruh bad u Tne Muruh kiba na ka shnong Lumkhudung West Jaiñtia Hills District.
Katkum kum ka khubor la iathuh ba kane ka case ka dei kaba la slem bad kaba la jia naduh u snem 1991, ha kaba ha ka 16.11.1991 la wan ban buh ia ka ejahar ha u In-charge Ummulong Beat House, Jowai da u Kaia Muruh uba dei u para jong Sada Muruh u la shah pyniap dusmon ha ki 5 ngut ki briew kiba kynthup ia u Tngen Muruh, u Lowit Muruh, u She Muruh, u Tne Muruh bad u Kamai Muruh kiba dei na ka shnong Lumkhudung kaba la jia ha katei hi ka sngi (16.11.1991) ha shnong Lumkhudung. Na ka liang ki Pulit jong ka Jowai Police Station kila register ia ka Case katkum ka Jowai PS Case No.166 (9)1991 U/s 302/34 IPC. Ia kane ka Case la aiti ban tohkit da u SI ma Q.E. Pala.
Na ka liang jong utei u ophisar ula pynlong ka Charge sheet ia baroh kitei ki san ngut bad la pynngat ia ki hapoh ka kyndon U/S 302/34 IPC, hynrei utei u ophisar ma Q.E. Pala ula khlad noh ha ka 11.06.2022.
Kumjuh ruh ki ar ngut kiba la shah pynngat kyndon kiba kynthup ia u Kamai Muruh bad u Lowit Muruh kine ruh kila khlad noh hadpeng ka jingiaid jong ka case, kumta ka case kala iaid noh satang ia kitei ki lai ngut ki runar ba kynthup ia u Tngen Muruh, u She Muruh bad u Tne Muruh, kiba la shah rai pynrem noh ha kane ka 4 tarik mynta u bnai da kaba shah set phatok shijingim.