Ka Akhil Bharatiya Vidyarthi Parishad (ABVP), Meghalaya ha ka 23 tarik Risaw 2021 ka la pynlong ia ka District Training Camp ba shisngi na ka bynta ki dkhot kiba don ha West Jaintia Hills District ban ai ka jingpynsngewthuh shaphang ki nongrim treikam ka seng.
La pynlong ia kane training ha Yungwalieh ka Dorbar Shnong Chilliangraij ha kaba ki dkhot ba thymmai ka seng na kylleng ki shnong ka West Jaiñtia Hills District ki la wan ban iashim bynta.
La ioh ia ka jingkren pdiang na ka Darilin Tang, Central Working Committee ABVP, India bad pynbud pat sa da ka Training ba la phiah ha ki lai bynta ha kaba ki dkhot ba shemphang jong ka ABVP ba kynthup ia u Fullmoon Suchiang, District In charge ABVP West Jaiñtia Hills, ka Nidiang Sumer, State Secretary Meghalaya ABVP bad kiwei ki dkhot ka seng ki la shim ban batai bad pynsngewthuh ia ki nongiashimbynta ha kane ka sngi.
Ka kong Darilin Tang, haba ai jingkren ka la iathuh ba ka nongrim treikam jong ka ABVP ka long ban saiñdur ia ki khun samla kiba don ha ki Skul bad Kolej khnang ba kin ioh ia ka lawei ba phyrnai kum ki nongshongshnong ka Ri.
