Ki nongshong shnong jong ka Ladrymbai Khliehdupon kila pynpaw ba ki don hapdeng ka umdum bad kim iohlad shuh ban leh kino kino ki kam kiba iadei bad ki kam shnong kam thaw khamtam ki kam kiba iadei bad u Waheh Shnong namar ka por treikam ne ka samoi jong u Waheh Shnong barim kala kut mynta la shibnai shiteng.
Ha kaba iadei bad kane na ka liang u samla rangbah Kyrshan Blah uwei na ki nongialam sengbhalang ka thaiñ uba dei ruh u nongshong shnong ka Ladrymbai Khliehdupon ula pynpaw sha ki lad pathai khubor ba ka jingbym pat ioh ia u Waheh Shnong ha kine ki por kala wan rah shisha ia ka jingeh ia ki nongshong shnong baroh. Khamtam ha kaba iadei bad ki khun ki kti jong ki nongshong shnong kiba donkam ha ki kam pule puthi jong ki, ba kin ioh ia ki kot ki sla na u Waheh Shnong.
Nalor kata ka jingbym don Waheh Shnong kala pyndkhot lut ia kiba bun ki kam hapoh ka shnong ka thaw, la ka dei ha ki skhim sorkar ne kino kino ki kam pynroi pynpar.
Kumta na ka liang ki nongshong shnong ka Ladrymbai Khliehdupon ki buh ka jingkyrpad jur ia u Dalloi ka Elaka Rymbai ba un shim khia lem ia kane ka kam shnong kam thaw ha kaba un khot pynlong noh ia ka jingjied ia u Waheh Shnong na ka bynta kane ka wei pat ka samoi.
U ma Kyrshan ula kyntu jur ia ki nongpyniaid shnong ruh ba kin khot noh ia ka Dorbar Shnong khnang ban ioh iapynbeit ia kane ka kam ba la sahteng.
Ha ka juh ka por na ka liang u Kyrshan Blah ula ong ba mynta ki nongshong shnong baroh kila long kiba la nang la stad kumta u kyntu ia u Dalloi ba haba pynlong iaka jingiajied ia u Waheh Shnong na ka bynta ka samoi ban wan la dei ba pynlong noh da ka jingiathep vote lyngba ki Secret Ballot, ym shuh da kaba shu ia rahkti, khnang ba ki paidbah kin ioh ban jied da ka mon ba laitluid ia uno uno u briew uba ki mon.