Ia ka Lama lai rong jong ka ri India la wan ban pynher mynta ka sngi da u Deputy Chief Minister ka sorkar Jylla u ma Sniawbhalang Dhar, ha ka jingrakhe ia ka lyngkhuh snem ba 77 jong ka jingioh laitluid jong ka ri India ha madan Jrisaleiñ, Jowai.
Ka jingrakhe ia kane ka jinglehkmen ka long kaba phuh ba phieng bad kaba shongshit ha kaba ki paidbah na kylleng ki dong ki shnong jong ka nongbah Jowai kila wan ban sakhi lang.
Ha kane ka sngi kila don haduh 29 tylli ki kynhun (Contingent) kiba iashim bynta ha ka March pass kiba kynthup ia ki kynhun Pulit, NCC, Scouts & Guides, ki samla College bad ki khynnah skul, ia kaba la shim salute da u ma Sniawbhalang Dhar.
La don ruh ka jingsam khusnam sha ki PHC, CHC, ia ki riew shimet ba don bynta ha ka jingiada mariang bad sha ki nongjop ha ka March pass. Ia ka kyrdan ba nyngkong la ioh rah da ka St. Marry Mazzarello HSS, ba ar la ioh rah da ka Jaiñtia Secondary School bad ba lai la ioh rah da ka St. Michael & All Angels Secondary School.
Ka la don ruh ka jingiashim bynta ha ka jingshad bad jingrwai tynrai da ki kynhun bapher bapher kum ka jingpynbyrngia ia ki nongwan peitkai.
