Ka All Jaintia Muster Roll Workers & Labour Union (AJMRWLU) ha ka jingrakhe dap 8 snem jong ka hynne ka sngi ha madan Ummulong Dorbar Shnong, West Jaiñtia Hills kala pynlong ruh ia ka jingai khusnam ia ki lad pathai khubor (Print and Electronic media) kiba na ri Lum Jaiñtia.
Kane ka jingpynkup burom jong ka Union ia kine ki lad pathai khubor na ri Lum Jaiñtia kiba kynthup ia u Yutip Man Ka Sngi (News Paper & yutipnews.com), Wyrta bad u Syllad, ka long halor ka jingshakri paidbah jong ki, bad ia ka Union kumjuh.
Na ka liang jong u Yutip la wan ban pdiang ia ka jingaisngew sngewbha da u Editor ma M.M. Thaiang bad na ka liang jong u Wyrta la wan ban shimti da ka kong Ribha Shadap.Hadien ka jingai khusnam la ioh ruh ia ka jingkren sngewnguh bad ka sneng ka kraw na u Editor ka Yutip na M.M. Thaiang. Haba kren ha kane ka sngi u ma Thaiang u ong ba kum ki lad pathai khubor na ri Lum Jaiñtia kila pyrshang ba ai ka jingshakri kaba bha katba lah ei ia ki nongshong shnong ka District, ka Jylla bad ia ki nongshong shnong jong ka ri India.
Nangta u ma Thaiang kum u Editor jong u Yutip ula pynkynmaw ba u Kot Khubor Yutip u dei tang ma u u kot khubor na ri Lum Jaiñtia bad ha jing iaid lynti jong u ha kine ki phew snem kiba la leit u la pyrshang ban ai ki khubor kiba thikna sha ki paidbah jong ka ri.Ha ka juh ka por u ma Thaiang u la kyntu ia ki dkhot jong ka Union kiba trei ha ki Department bapher bapher ba kin long kiba iatylli namar ka jingiatylli ka long ka bor. Nangta u ong ia kano kano ka Press Release kaba mih na ka Union ki lad pathai khubor ka ri Lum Jaiñtia kim ju pep ban pynmih ia ki.
U la pynkut ia ka jingkren da kaba ai ka jingkyrkhu kyrdoh ia ka Union ba kan nang iaid shaphrang ha ki sngi bad ki por ki ban dang wan.