Ka jingiakynduh jong ka Regional Committee jong ki ar liang mamla kata na ka Meghalaya and Assam hapoh ka jingialam jong ki Chairman ma Sniawbhalang Dhar, Deputy Chief Minister ka Meghalaya bad u Pijush Hazarika, Minister ka Water Resources, Assam ka la long ha shnong Khanduli West Jaiñtia hynnin ka sngi (16, 2023).
Ha kane ka sngi la don ka jingaiti ia ki Memorandom da baroh ar liang kata da ki jaitbynriew Pnar bad ki Karbi hala ki jong ki jong ki jaka ban pynpaw ia ka jingsngew jong ki hakhmat ki dkhot jong ka Committee. Ka la don ruh ka jingleit jurip lang ia ka Entry tax gate kaba la buh da ka Karbi Anglong Autonomous Council (KAAC).
Haba kren sha ki lad pathai khubor u ma Sniawbhalang Dhar, ula ong ba ka jingthmu jong kane ka jingiakynduh jong ki ar Regional Committee ka long wan rah ka jingsngew shaniah ia baroh ki ar jait bynriew bad ban sngap ia ka jingdawa jong ki nongshong shnong katei ka thaiñ. Ula ong ruh ba dei ban pynneh pynsah ia ka jingshong suk shong shngaiñ ha kitei ki jaka.
Na ka liang jong u Pijush Hazarika u la ong ba na baroh ar liang jait bynriew kin pynpoi ia ka kaiphot sha la ki jong ki jong ki Myntri Rangbah bad ban shim ia ka kwah jong ki nongshong shnong ka thaiñ katkum ba shong ka nongrim.
Ia u Deputy CM ka Meghalaya la synrang lang da u Myntri ba dei peit ia ka Civil Defence & Home Guards u ma Comingone Ymbon, bad u Deputy Chief Whip ka Meghalaya Legislative Assembly ma Nujorki Sungoh, u Secretary to the Government of Meghalaya u bah Cyril V Diengdoh, IAS, u DC ka West Jaiñtia Hills District bah B.S. Sohliya, IAS, u SP bah C. Syrti, MPS, u CEM ka JHADC ma Thombor Shiwar, ma Aiborlang Shadap MDC ka Barato bad u MLA barim Draison Kharshiing. Katba ia u Myntri ka Assam la synran da ka DC ka West Karbi Anglong ka Khrisna Barua, u Rupsing Teron MLA, u SP ka West Karbi u Indranil Baruah APS bad kiwei, nalor ki Pulit na baroh ar liang.
