Ka Khubor bala phah la iathuh ba u Nicholas Low, uba long u British Deputy High Commissioner, Kolkata hynnin ka sngi ryngkat ka jingleh burom, u la leit ban ia kynduh ia u Lat ka Jylla Meghalaya u Phagu Chauhan ha jaka treikam jong u ha Raj Bhavan, Shillong.
Ha kane ka jingiakynduh jong bad u ia u Lat ka jylla, u Low u la tyrwa ia ka jingkloi ban kyrshan bad iatrei lang ban pynkiew ia ka jylla Meghalaya, khamtam eh ha ki liang ka Koit ka Khiah (Healthcare), ka kam jngohkai pyrthei (Tourism), ka pule puthi (Education) bad kiwei kiwei.
U la iaroh ia ka jingitynnad ka mariang bad ka jingiasyriem ka jylla Meghalaya bad ka United Kingdom (UK), khamtam bad ka ri Scotland bad batai bniah ruh ia ka jingiadei ka ri UK bad ka Scotland, ka ri kaba la synshar da ka UK bad ka jylla Meghalaya kaba la ju tip kum ka “Scotland of the East”. U la iaroh ia ka jinglah ban pynneh pynsah ia ka jingitynnad ka jaka baroh kawei hapoh ka Raj Bhavan kaba long ka jingtei kaba la rim bha bad u la ai khublei ruh ia u Lat ka jylla ia ka jingleh bha jong u.