Ka School Managing Committee jong ka Loompyrdi Iongpiah U.P. School, Jowai mynta ka sngi 21 tarik u Nailar kala sdang ïa ka taïew lehkmen kaba la tip kum ka 13th School Week kaba la pynlong ha ïungwalieh ka Loompyrdi Iongpiah, Jowai.
Ïa kane ka School Week la wan ban plie pyrda da u President ka Seiñ Raij Jowai ma Hercules Toi kum kongsan, ha ka jingdonlang u C.A. Ram Kyndiah, Secretary SMC kum u symbud kongsan, u ma Bimi L. Suwer, General Secretary Loompyrdi Iongpiah, ki dkhot ka School Managing Committee kynthup ïa u ma W.Challam, u ma K.F.Laloo nalor ki nonghikai bad ki khynnah skul.
Ïa ka jingïalang ha kane ka sngi la pynïaid da ka Dariker Lato, Asst. Teacher la ïoh ka jingkren pdiang na ka Sanki Toi, Asst. Headmistress, ka jingnguhblei na u B.M. Shylla, Asst. Teacher.
U ma Hercules Toi ha ka jingkren ula kyntu ïa ki khynnah skul ban long kiba shlur ban ïashim bynta ha kino kino ki jingïakop da kaba pynduh pyndam ïa ka jingsngewlehraiñ namar kum kine ki rynsan lehkmen kan ïarap ban sei pyrthei ïa ka sap ka phong ki khynnah, ong u ma Toi.
Shuh shuh ula ban jur ïa ki khynnah skul ba kin long kiba tip ban kheiñkor ïa ka por ba kordor bad ban ri burom ïa ka akor kaba long ka spah bah ïa ka longbriew man briew bad ïa ka ïing ka sem. Ula kyntu ruh ïa ki khynnah ba kin long kiba don ïa ka thong ha ka jingim bad kiba trei shitom.
Katba na ka liang ka Nitu Chullai, Headteacher Loompyrdi Iongpiah U.P.School kala pynsngew ha kane ka taïew lehkmen ‘School Week’ kin don shibun ki prokram kiba pynbyrnia bad pynshongshit ïa ki khynnah skul, ïa kaba yn pynkut ïa ka ha ka 25 tarik u Nailar, 2023.
