Yn ujor ïa ki Pulit ba khrong pisa na ki kali hadien ba la ïoh lum video na ki Drone: Tuesday Lytep
U President ka Federation of Khasi & Garo People (FKJGP) Jaiñtia Hill Zone u ma Tuesday Lytep ula pynpaw ka jingpyrshah jur halor ka jinglehbor jong ki pulit ïa ki paidbah ba pyrshah ïa ka jingpynsngew paidbah (Public Hearing) ha Thangskai da kaba kawang lathi, kynjat, kura bad siat tear gas. Ula ong kane ka jingleh ki pulit ka long tang ban pynkohnguh ïa kitei ki heh nongpynïaid jong katei ka kompani Meghalaya Cement Limited kiba la dep thied ïa ki bad hukum ban phah bom naphang ïa ki paidbah.
Shuh shuh u ma Lytep ula ong kane ka jingleh jong ki pulit ka don kaei re kaei sha lyndet wat ïa ki nongmihkhmat jong katei ka thaiñ kiba dei ki MLA kila shah thied ha kitei ki heh spah jong ki Company Cement kim bym nud ban ong ei halor kane. Ula ban jur kum ki nongmihkhmat jong ki paidbah na katei ka thaiñ naduh u ma Kyrmen Shylla bad ka kong Santa Mary Shylla ki dei ban don ka jingkitkhlieh na ka bynta ki paidbah ym ban shah thied ha kitei ki Dkhar Company.
Halor kane ka jinglehbor palat jong ki pulit ula pynrem jur ïa kane, da kaba ong ki pulit ki khlem lehraiñ haka kam wat ban lute na ki kali ba ïaid lynti lyngba u surok NH-6 naduh Ummulong haduh Ratacherra East Jaiñtia Hills. Na ka liang jong u ma Lytep ula ïathuh ba ula dep ban shon dur ïa ki pulit kiba khrong ha shi lynter surok lynga ki Drone bad ïa kane un sa leit ujor da ka kes sha ka ïing bishar ba don burom khnang ba kitei ki Pulit ba donkti ha ka kan khrong be-aiñ kin ngat ha ka jingshah pynshitom.