U samla rangbah ma Ency Shadap, na ka shnong Khliehriat West, uba dei ruh uwei na ki nongialam Sengbhalang ha ri Lum Jaiñtia, mynta ka sngi ula leit ban ujor da ka ejahar (FIR) hapoh ka thanat Lumshnong Police Station halor ka jingdonkti jong u heh bad nongtrei ka Company Topcem ban bthah ia ki Pulit ban shoh ban tied ia ki traishnong kiba pynpaw ka jingpyrshah halor ka Public Hearing bala pynlong da katei ka Company ha ka 24 tarik mynta u bnai ha jaka treikam jong ka kaba don ha shnong Thangskai.
Na ka liang jong u ma Ency ula ujor ia kane ka ejahar pyrshah ia u Managing Director bad ruh ia ki nongtrei jong ka Topcem Cement Thangskai, hadien ba ula iohi kumba paw ha ki dur video ba utei u MD ryngkat ki nongtrei kila kynshoit ia ki Pulit ban shoh bad ban tied ia ki paidbah kiba dei ki trai shnong, nalor kata kila bthah ruh ia ki Pulit wat ban shim ia ka jingim jong kitei ki trai shnong kumba ka paw lyngba ki video ba la ioh ring dur la pynpaw u ma Ency ha ka ejahar.
Kumta u ma Ency ula kyntu jur ia ki bor Pulit jong ka Lumshnong PS ba ki dei ban kem bad pynlong ia ka jingtohkit ba mar dor bad ban pynshitom ia utei u MD ryngkat ki nongtrei ka company katkum ki kyndon jong ka aiñ.