U Superintendent of Police ka East Jaiñtia Hills District, u Jagpal Singh Dhanao, IPS ula pyntip ba mynnin ka sngi kata ka 24 tarik u Nailar, 2023 la don ka jingpynlong ia ka jingpynsngew paidbah (Public Hearing) hapoh ka jaka treikam jong ka Meghalaya Cements Limited, Thangskai bad kala wanrah ia ka jingiapyni bor hapdeng ki Pulit bad ki paidbah kiba ia pyrshah. Katkum ka jingringdur ia kane ka jingjia kala paw pyrthei lyngba ka Youtube channel, ha kaba la iohi ia ki katto katne ngut ki briew kiba la ia pyrta jam da ki kyntien sniew bad kynshoit ban pynheh ia ka jingiakulmar ha katei ka jaka.
Ha kaba ia dei bad kane ka jingjia u SP ula iathuh ba la registered ia ka case pyrshah ia kito kiba paw dur katkum ka case No. 46(08)2023 U/s 153B/503/504/506 IPC hapoh Lumshnong Police Station. Ka jingtohkit mynta ka la iaid shakhmat bad katkum ka kyndon 91 CrPC la bthah ia katei ka tnad pathai khubor ban pynioh ia kane ka jingringdur (video) ban long kum ka sabut katkum ka aiñ ‘Evidence Act’.
Ki Pulit ka jylla Meghalaya ki long kiba la aiti ban pynneh ia ka suk ka saiñ hapdeng baroh ki jaitbynriew bad kino kino kiba pynkheiñ ne leh tam kin shah pynshitom katkum ka aiñ, ong u SP.