– Ka jinglehkai Gym kan ïarap ïa ki khun samla ban lait na ki kam sniew: Yoosar –
Ka Jaiñtia Body Building & Fitness Association (JBB&FA) kaba la seng da u Samla Yoosar Kynjing, naka shnong Panaliar Jowai da ka jingthmu ban pynkiew ïa ka sap ka phong jong ki khun samla ka Ri-Lum Jaiñtia, ha ka liang ka rukom pynwan dur pynwandar ïa ki dohksah ha ka met ka phat.
Mynta ka kynti ha ka sien kaba lai lyngba ka Jaiñtia Body Building & Fitness Association, ha ryngkat ka jingïatreilang ka Meghalaya Body Building & Fitness Association (MBB&FA) bad ka World Fitness Association (WFF) kin pynlong biang ïa ka rynsan pyni dohksah ba heh duh ha nongbah Jowai kaba la tip kum ka “3rd All Meghalaya Amateur Body Building Championship Mr. Ironman Amateur 2023”.
Ïa kane ka lympung yn pynlong ha ka 2 tarik u September, 2023 ha District Library Auditorium Mynthong Jowai.
Haba ïakren bad u President ka JBB&FA samla Yoosar Kynjing ula ong ba ka jingthmu hi ban pynlong ïa kum kane ka rynsan pyni dohksah ka long shi bynta ban pynrung ha ki jingmut jingpyrkhat jong ki khun samla napoh ka Ri-Lum Jaiñtia ban kin sngewtynnad ïa kane ka jingkilan met (Gym) kaba lah ban wanrah ïa ka jingkoit jingkhiah bad ban lait na ki kam sniew kiba ha rukom ha ka jinglong samla jong ki.
Ula ïathuh ka kam ïalehkai ‘Gym’ mynta kala sdang ban suh thied hapoh ka Ri-Lum Jaiñtia bad kiba bun na ki samla kila pyllait por khnang ban leit sha ki jaka kilan met (Gym) kiba don ha sor Jowai wad ha ki bynta jong ka East Jaiñtia Hills kumjuh.
“Ha ka jingïaid lynti na ka bynta ki khun samla ym lah ban leh ba ki don shibun ki riew rangbah napoh ka sor Jowai kiba la ai mynsiem ïa nga ba ngan dang bteng ïa kane ka kam khlem da kynrad dien” ong u samla Yoosar.
Ula pyntip la lai snem mynta ka jingïaid lynti jong ka ‘Jaiñtia Body Building & Fitness Association’ (JBB&FA), haoid ki don shibun ki jingeh kiba lah ban ïa kynduh namar ka seng kam juh wad ïa kino kino ki lad jingïarap (Fund) na ki riew shimet bad kumjuh na kiwei de.
Hynrei ha kane ka kynti kum ka lad ban ïoh jingkyrshan khyndiat khynsoit haka rukom pynmih Fund ïa ka seng yn pynkhalai da ka Lucky Draw kaba rit kum ka jingsdang ha katei ka sngi 2 tarik u September, 2023.Ha kane ka “3rd All Meghalaya Amateur Body Building Championship Mr. Ironman Amateur 2023”, la pyntip ba yn sam ruh ïa ki khusnam sha ki nongjop da ka Cash Prize na ka bynta ki Overall Winner & Category Winner da ka jingithuh jong ka Meghalaya Body Building & Fitness Association bad ka World Fitness Federation India.
Na ka bynta ki Guest Posers kiba wan pynshong shit ha kane ka rynsan ki dei kiba jop na shabar ka jylla kiba kynthup ïa ka MS. Suzie Oreal Basan MR/MS. Women’s Physique NPC Nagaland 2023, ka MS. Jehvera B Nongkynrih MR/MS. India 2022, u Mr. Wanraplang Thubru MR/MS. India 2022 bad u Mr. Vivan Oswin Pajuh MR/MS. East India 2022.
U samla Yoosar ula pyntip ruh kiba wan ïashim bynta ha kane ka rynsan ki lah ban don haduh 70 ngut tam ei ei bad ki nongïashim bynta yn pdiang ïa kiba wan napoh ka Ri-Lum Jaiñtia, na Khasi, na Garo bad ïa kito kiba wan shong shnong hapoh ka jylla.
Ha ka juh ka por ka JBB&FA kan sam ruh ïa ki khusnam (Award) ba kyrpang sha ki Body Builder kiba jop shabar jong ka States, ïa ki nongthoh khubor hapoh Ri-lum Jaiñtia nalor kiwei kiwei de.
Katba ïa ki Ticket na ka bynta ki paidbah kiba wan sakhi ïa kane ka rynsan ki lah ban ïoh ha katei hi ka sngi ha ka jaka ba pynlong ïa kane ka rynsan kiba long kumne: 1) Donors Card Rs.500 bad 2) Executive Class Rs.300.Ha ka juh ka sngi ka JBB&FA kan pynkhalai kumjuh ïa ka Lucky Draw kaba long 1st Prize: 50,000/-, 2nd Prize: 20,000/- bad ka 3rd Prize: 10,000.
