Kyntu ban khang noh ïaka jingtih maw ha Mynsoo
Ka jingsniew shaba palat jong ka surok Samatan-Mynsoo kala buh jingeh haka leit ka wan jong ki paidbah naka daw ka jingtih maw pathar jong ki briew haki bynta ka wah Mynsoo hashwa ban poi ka jingkieng Wah Myntang, West Jaiñtia Hills District.
Kiba bun na ki paidbah kila pynsngew ïa kane ka jingeh kaba kila mad la kumba san snem mynta, ha kaba ka surok ka don hapdeng ka jingkhohruh khohram bad ym don shuh kiba peit bad pynbha hynrei la ieh sah ïa ka kumto.
Kitei ki paidbah kila pyntip ba ynda ki kali kiba la poi ha katei ka jaka ba tih par maw khamtam ha ka por ba slap ka buh jingeh ïa ki kali ban jam, haduh ba ka pynlong ïa ki nongleit nongwan ban hiar khynñiat ïa ki kali ban pynlait shiliang.
Ki paidbah na katei ki thaiñ bad kumjuh kiba ïaid lynti na katei ka surok ki buh ka jingkyntu na ka sorkar khamtam ïa ka tnad PWD ba kan shimkhia mardor ïa kane da kaba maramot noh ïa ki bynta jong katei ka surok kaba la sniew shaba palat kaba la wanrah ruh ka jingsahkut kali na ka por sha ka por.
Ha kaba ïadei bad katei ka par maw ruh la dei ban hukum ïa ki nongtih ba kim bit ban tip maw shuh bad la kyntu ïa ki bor shnong bad ïa ka sorkar ba kin shimkhia ïa kane namar ka jingbteng ban tih maw ha katei ka jaka ka dei ka daw ba wanrah ïa ka jingsniew bad ka jingpynjot pynpra ïa ka surok.
