Ha ka sien kaba nyngkong eh ha baroh kawei ka jylla Shatei Lam Mihngi (Northeastern Region), ba ka tnad trei kam jong ka Food Civil Supplies & Consumer Affairs ha ryngkat ka jingiateh lok bad ka United Nations World Food Programme (WFP), ka la pyllait ia ka kor thew hi ia ki symboh khaw (Automated Grain Dispensing Machine), ka “Annapurti” ha dukan sam Khaw Rashon kaba don ha R.R. Colony, Rynjah, Shillong. Ka pyntrei kam ia kane ka kor kan pyntikna ia ka rukom sam khaw bad kiwei kiwei katkum ka jingioh jong ki nongioh myntoi (beneficiaries) bad kan pynlah ruh ia ki nongsam (Fair Price Shop) ia kine ki marbam ban kham pynbha ia ka rukom sam jong ki.
La iadon lang ha kane ka programme u Ma Comingone Ymbon, uba long u myntri ka tnad Food Civil Supplies & Consumer Affairs, ka Ms Elisabeth Faure, kaba long ka Country Director ka World Food Programme ka United Nations, ryngkat ki heh sorkar na ka tnad Food Civil Supplies & Consumer Affairs ka sorkar Meghalaya.
Haba iaroh ia ka jingpyrshang ba radbah jong ka tnad Food Civil Supplies & Consumer Affairs bad ka World Food Programme(WFP), u Ma Comingone Ymbon u la khot lang ia baroh ki nongdon bynta(stakeholders) ban leh ia kaba donkam ban peit ba ka jingsam ia ki marbam sha baroh khamtam sha kito kiba donkam da kaba pyrshang ban wanrah ki jingkylla na ka bynta ka jingioh jingkot ka jylla. U Ma Comingone Ymbon ula pynpaw ia ka jingmut ba u don ban pyndonkam noh da ki kor ka juk ba mynta ha ki jaka sam(PDS) ia ki khaw rashon khnang ba ka jingthew bad sam ia ki khaw da ki kine ki kor kan long kaba beit bad kaba khuid khlem kano kano ka jinglah shiliang.
Kane ka kor sam khaw (ATM grain machine) kan pyntikna ia ka jingthew bad jingsam kaba biang beit thik sha baroh ki nongioh myntoi(beneficiaries) ka jylla hapoh ka National Food Security Act(NFSA), ia kito kiba nabar ka jylla bad kiba na kiwei ki district kiba long ki nongioh myntoi. Kane ka kor ka lah ban thew bad sam kumba 200 kilo haduh 500 kilo ia ka ban pyniaid lyngba ka ka kynja tiar e-POS kaba don ka jingtikna kumba 99.99 per cent ka jinglah trei kam jong kaba stet bad ba lah ban pynduna kumba 40 per cent ia ka jingap ki briew ban ioh ia ka pali jong ki. Ka jingdonkam kane kor Annapurti ka long ba ka don ka bor ban pynbiang ha ka rukom thew ia ki khaw rashon ban pyntikna ba ki nongioh bynta kin ioh kloi ia ka jingiarap ha ka rukom u khaw bad kiwei kiwei man la u bnai. Ka jinglah jong kane ka kor ban pynbiang thik ia ki jingthew kan iarap ban iada na kano kano ka jingduh ei u khaw bad ban pyntikna ruh ba baroh kin ioh iala ka jong ka bhah jong ki katkum ka hok ba ki dei ban ioh.
Ha ki por ka jngdonkam kyrkieh ne donkam kyndit, kum haba don ki jingjulor haba wan shop ki bor ka mariang ne haba wan ki jingjia kum ka khlam kaba ktah ia ka imlang ka sahlang, kane ka kor ka don ka bor ban pynkloi ia ka jingsam ia ki jingdonkam ki marbam kum u khaw, atta bad kiwei kiwei ki marbam sha ki lanot kiba kiba shem jingeh. La shna bad pynwan dur ia ka rukom trei kane ka kor Annapurti ban pynduna ia ka jingpyndonkam ki bor met ha kaba sam rashon bad ruh ban pynduna ia ki jingbakla kiba lah ban mih ha ka por sam ia u khaw rashon. La shna ia ka kor Annapurti ha ka rukom ba kan lah ban pynbiang beit ia ka jingthew ia ki marbam bad ban pynduna ia ka jingpyndonkam ia ka bor met ban trei ia ka juh. Da ka jingbam duna ia ka bor ding electric kaba tang 0.6 watt shi kynta, ka wanrah ruh ia ka jingkhuid ha ka mariang.
Ia kane ka kor la shna ha kiba bun ki bynta ba long lyngkhot lyngkhot kiba lah ban pyndait lang bad ban buh ia ka ha kano kano ka jaka kaba ibit bad ibiang. Ia ka kor Annapurti lah ban pyniaid bad pyntrei kam da kaba pyndonkam da ki solar panel, inverter batteries bad ki elevator khlem jingthut. Kane ka rukom pynlong ia ka kor ka pynlah ban pynduna ia ka jingpyndonkam ia ka bor ding electric. Ha ka WFT Innovation Awards kaba la long ha u snem 2022, ka kor Annapurti ka la ioh ia ka jingithuh kum kawei napdeng ki san tylli ki lad thymmai ka World Food Programme.
Ha ka jylla kaba rit kum ka jylla Meghalaya, ka jingpyrshang bad ka jingtrei minot jong ka tnad Food Civil Supplies and Consumer Affairs ka la long ka sien ban pynsah nam ia ka jylla Meghalaya kum kawei na ki jylla ba rit tam ha ka ri ban lam lynti shakhmat ha ka ban wanrah ia ka jingpyntikna ha ban pynioh ia ki jingbam kiba tei bad ba khuid sha baroh ki paid nongshongshnong ka jylla.