Ka Khasi Jaiñtia Youth Student Union (KJYSU) hadien ba kala ïohi ïa ka jingud jingnam jong ki nongñiah trok namar ka jingdon ki nongkhrong ha shi lynter u surok NH-6.
Na ka liang ka seng ka pynpaw ïa ka jingsngewrem bad ka jingsngewsih ba ki para doh para snem kiba ñiah trok kim ïoh shuh ïa ka jinglaitluid hapoh ka ri la jong. Kumta ka seng ka kwah ban buh jingkylli mano ba khrong ha u surok ne mano ba ai bor ïa ki ban khrong namar ïa ki kali rit ne kali heh hashwa ba kin mih na ïing ban leit donkam kila don lypa ïa ki kot ki sla.
Kumjuh ruh ki trok ba kit mar kit mata kila don ïa ka Challan, Weight Bridge ter ter. Te ha kano ka rukom ba ki nongkhrong ki ïoh lad ban khrong namar kila dep siew ïa ka Road Tax, GST bad kiwei, ong shuh shuh ka seng.
Khadduh khatwai na ka liang ka seng kaba peit ïa ka khia ka shon jong ki nongshong shnong jong ka jylla ka kren da kaba shai ‘sngewbha wat khrong ne pynsaja ïa u khun ka bri u hynñiewtrep Hynñiewskum bad dei ban sangeh noh hapoh shi taïew’ lada kim sangeh ban khrong ha surok ka seng kam banse ban leit tied shaduh ka ïing bishar ba don burom. Pynkut ka kyrwoh na u President ka KJYSU u bah Chemi Phawa.