Khnang ban wan rah iaka jingshongsuk shongsaiñ hapdeng ki jaitbynriew Karbi bad jait bynriew Khasi-Pnar, la pynlong ia ka jingiakynduhlang hapdeng ki dkhot ka Jaintia Students Movment (JSM) bad ki nongialam ka Karbi Students Association (KSA), ia kane ka jingialang la pynlong ha Diphu, Assam, hynnin ka sngi miet Balang.
Ha kane ka jingialang naka liang ka JSM la lamkhmat da u President Rangbah ka JSM sengkmie u bah Leaningstar Rymbai katba na ka liang ka KSA pat la lamkhmat da u Mirjeng Kro uba long u President CEC, ha ka jingiadonlang ki riew pawkhmat jong ki Karbi.
Ha kane ka jingialang la thaw (Form) ruh iaka Students Committee For Peace Initiative (SCFPI), bad ha kane ka jingialang la ia kren beit thik kumno ban wan rah iaka shong suk shong saiñ hapdeng ki ar jait bynriew kiba dei hapoh ka wei ka Ri na ka bynta ban ioh biang ka iaid ka ieng ka rep ka riang ka khaïi ka pateng kaba iaid beit iaid ryntih khlem kano kano ka jingiakynad ne klumar, namar ka jing ia pynibor mar kylliang kan nym poi shano shano bad kan ym wan rah iaka shong suk shong saiñ hapdeng kine ki ar jaitbynriew.
Ka jingthum jong katei ka Committee ka long ban wanrah ia ka jingiasuk ia saiñ nangne sha khmat. Ha kane ka jingiakren na ka liang ki nongialam ka KSA ruh kila ong ba kin sa wan sha poh ka jylla Meghalaya ban iakren ne thaw ia ki lad ki lynti halor kane ka juh ka phang kaba dei shaphang ka iasuk iasaiñ.