Mynta ka sngi ka 31/08/2023 ka Jaiñtia National Council (JNC) Khliehriat Circle hapoh ka Jingialam u General Secretary Bah Mebanteilang Sukhlaiñ kala leit ban jurip ia kawei ka office hapoh EJHD ka Tourist Officer and Information Centre, hadien ba ka seng kala ioh jingujor na kiba bun ki nongshong shnong ka thaiñ ba ym ju don nongtrei ha katei ka office.
Ha ka jing jurip ka seng ka lap shi sha ba ka office ka plie tang ka jingkhang hynrei ym don satia wat tang u Peon ruh bad la ioh jingtip ruh ba i officer ba dei peit ia katei ka tnat im juh wan trei la kumba 1 snem. Halor kane ka seng ka dawa ba i officer i dei ban pynshai ba na kaei ka daw ba im juh wan sha jingtrei. Kane ka buh jingeh ia ki paidbah khamtam ha ka kam Tourism, ba lada ym don nongtrei kumno yn lah ban kyntiew (promote) ia ka kam tourism ha kane ka thaiñ.
Ka seng ka buh jingkylli ruh ba ka sorkar ka ai tulop ne em ia kine ki nongtrei bym ju wan trei, kumba la paw ba bun ki jaka jngohkai kiba don ha kane ka thaiñ kiba i donkam shisha ban ioh ia ka jingiarap na kane ka tnat treikam khnang ba kan wanrah jingmyntoi ym tang ia ka shnong ne ia ka thaiñ hynrei ia ka Jylla hi baroh kawei.
Ka seng ka kyntu ruh ia ka sorkar ba ym dei ban lehkai ia ka pisa jong u paidbah. Halor kane ka seng kala iakynduh ruh bad u Deputy Commissioner ka EJHD u A. Baranwal ban leh ei ei halor katei ka tnat treikam khnang ba kan lah ban ai ka jingshakri kaba pura ia ka thaiñ.
