Ka kywoh khubor ba la phah da ka KSU, Narpuh Circle la iathuh ba ha ka 30/08/2023, ka Seng hapoh ka jingialam u bah K S. Suchiang President, ki dkhot lem bad katto katne ngut ki nongialam napoh District Unit ki la leit ban buh da ka ejahar (FIR) hapoh ka ophis jong u Superintendent of Police, Khliehriat na ka bynta ban pynshitom ia kito ki Pulit kiba don kti ban shoh briew ha ka Public hearing jong ka Meghalaya Cement Ltd, Thangskai kaba dang shu dep long shen ha ka 24/08/2023.
Lah ban pynkynmaw ia ka jingjia ha katei ka sngi ba ki Pulit ki la shoh bad kawang lathi khlem jingmap wat ia ki kynthei khynnah ruh. Kat kum ka hok longbriew man briew (Human Rights) ym lah satia ban pdiang ia kane ka jingleh riewkhlaw (Police brutality) ki briew ba bat ia ka aiñ. Ka aiñ ka dei ban pynshitom ia baroh kito kiba don kti, ka aiñ kam dei ban theh shiliang, ka dei ban long mar katjuh (Equal) ia uba rit ne ba khraw.
Ka seng ka pynrem ruh ia ki MLA jong ka thaiñ kiba sngap jarjar khlem kren eiei ban iada ia ki paidbah lane ban dawa ia ka hok jong ki paidbah kumba ki kren kop ha ka por ba ki ialap elekshon ban iadon ryngkat bad u paidbah lada ki shah thombor pyrshah ia ka hok jong ki.