Ka Rupda RY Lato mynta ka sngi la ioh ban pyllait paidbah ia ka kot kaba ka la thoh hi kaba la ai kyrteng ka “PHASES”, ia kaba la pyllait paidbah da u kongsan ma Chibor Najiar, uba dei u Superintending Engineer (PHE), Rural Circle Shillong.
Ha kane ka sngi la iadonlang ruh kiba ha ïing ha sem jong ka Rupda naduh u kpa jong ka u ma Riquoma Rq Laloo uba long u waheh shnong ka Panaliar, ki kha ki man bad kiwei de kiba la shah khot sngewbha, ha ka jingialang kaba la long ha Yungwalieh ka Dorbar Shnong Panaliar Jowai.
Kum ban shu pynkynmaw ka samla Rupda RY Lato 22 snem ka rta, ka long kawei na ki samla na nongbah Jowai kaba shong ba sah ha ka shnong Panaliar Jowai, ka ban mih khmat ia ka ri India ha ka jingiakop Miss Aura International Beauty Pageant ha nongbah Antalya jong ka Ri Turkey, ka ban pynlong ha une u bnai September haduh u October 2023.
Na ka liang u kongsan u la kit bok kit rwiang ia ka samla Rupda ba kan nangiaid sha khmat ha ki kam jong ka, u la ai ruh ka jingiaroh ia ka, namar ka dei ka samla kaba don bun ki sap ki talen ym tang ha ka thoh kot hynrei ha ka jingiakop thei bha briew ha ki rynsan bah kiba ka la ioh ruh ban mih khmat ia ka ri India.
Ia kane ka kot jong ka samla Rupda lah ban ioh lyngba ka Amazon bad Flipkart.
