Ka Kashari jong u Session Judge, West Jaiñtia Hills District ka la hukum ban set along shi jingim ia ki lai ngut ki runar kiba donkti ban dkhat jubor ia ka jingim jong u Bah Lobi Chullet ha ka 1 tarik, Jylliew, 2006 ha kawei ka jaka ba la tip kum ka “Ait Shrieh’ ha ka shnong Thadsning.
Kine ki lai ngut ki dei kiba la tip kyrteng kum u Shem Langstang, u Tharki Langstang bad u Hiarki Langstang.
U kyrwoh ba la phah da u Superintendent of Police jong ka West Jaiñtia Hills District u la iathuh, ha ka 2 tarik, Jylliew, 2006 u Bah Barley Chullet, uba dei u para jong u Bah Lobi Chullet u la mudui da ka ejahar ha Jowai Police Station pyrshah ia u Shem Langstang, u Tharki Langstang bad ia u Hiarki Langstang halor ka jingkynnoh ba ki dei kiba donkti ban dkhat jubor ia ka jingim jong u Lobi Chullet ha ka 1 tarik, Jylliew, 2006 ha “Ait Shrieh”, Thadsning
Ki Pulit ki la register case ha Jowai Police Station hapoh ka Section 302/201/34 Indian Penal Code (IPC). Ia kane ka case la shimti ban tohkit da u SI C.Lamare. Hadien ka jingtohkit, u Investigating Officer (IO) u la pynngat kyndon pyrshah ia kine ki lai ngut hapoh ka Section 302/201/34 IPC.
Ha ka 30 tarik, Nailar, 2023 ka Kashari kaba la shong bishar halor kane ka jingjia, da kaba pynshong nongrim katkum ki sakhi sabut ka la rai pynrem ia u Shem Langstang, Tharki Langstang bad ia u Hiarki Langstang halor ka jingdonkti ban dkhat jubor ia ka mynsiem briew hapoh ka Section 302 IPC.