Ka kynhun Meghalaya Estimate Committee mynta ka sngi Balang kala hiar sha West Jaiñtia Hills District ban leit jurip ïa ka Residential School kaba don haka shnong Sabahmuswang WJHD.
Ïa kane ka Committee la lam khmat da u Chairman uba dei ruh u MLA ka Nongpoh bah Mayralborn Syiem, ha ryngkat ka jingsynranlang u MLA ka Mawkyrwat bah Renikton L Tongkhar, u MLA ka North- Shillong bah Adelbert Nongrum, u MLA ka Jowai ma Wailadmiki Shylla, U MLA ka Selsella u Arbinstone B Marak bad ka MLA jong ka Ampati ka Miani D Shira.
Ha kane ka jingleit jurip ka kynhun MEC kala lap ba katei ka Residential School ka dang donkam shibun ki jingdonkam kum ban pynbha pynmiat noh mardor naduh ki jingtei kiba pher bapher, haka juh ka por kitei members kila ai lad ruh ïa u Waheh Shnong ka Sabahmuswang bad ki trai jaka ba kin pynsngew ïa ki jingeh ha kaba ïadei bad katei ka jaka pule, khnang ba yn ïoh ban pynïaid shakhmat ïa katei ka Residential School.
Hadien kane ka jingleit jurip ïa kitei ki dkhot member jong ka MEC la leh burom ïa ki ha Community Hall jong ka Shnong Sabahmuswang WJHD.
Na ka liang u Deputy Commissioner, West Jaiñtia Hills u bah B.S Sohliya (IAS), ka District School Education Officer, Jowai kong A P Syiem nalor ki ophisar ka tnad PWD (Building) kila ïadonlang ha kane ka jingleit jurip.
