Ka Federation of Khasi Jaiñtia & Garo People (FKJGP) War Jaiñtia Circle ka pynpaw ka jingsngewnguh kaba khraw halor ka jingshimkhia ka tnat PWD (Roads) Jowai Central Division, hadien ka jingkyrpad jong ki bor shnong ïa ka Seng ba donkam ban dawa buh Speed Breaker ha u surok NH 40 (E) kata ha Lad Japlem bad ha Amlatdoh Amlarem West Jaiñtia Hills District.
Halor kane ka seng khlem pynslem dang ha kine ki khyndiat bnai ba la dep ka la leit kynduh markhmat bad ai da ka dorkhas ha u Executive Engineer PWD Roads Jowai Central Division, kumta mar mar khlem pynslem na ka liang ka tnat ka la shimkhia mardor ban leh ïa kaba donkam.
Kumta ha ka 4 tarik Nailur 2023 na ka liang ka tnat PWD ka la dep ban pyndait ïa kine ki Speed Breaker ha baroh ar jaka, kum ban pynshu kynmaw kine ki dei ki jaka kiba ma ka leit ka wan naba ym don Speed Breaker na ka jingpynher sted ïa ki kali kaba buh jingma ïa ki nongshong shnong khamtam ki khynnah skul.
Ka seng ka ai khublei kyrpang eh ïa u E.E PWD (Roads) Jowai Central Division u ma M. Tang SDO, u ma H. Pakynteiñ bad u J.E. ma S. Challam. Kane ka long katkum ka kyrwoh ba la phah da u President FKJGP War Jaiñtia Circle Bah B. Mukhim bad u General Secretary Bah K.M. Khonglah.